Nur-Sultanda 42,5 myń teńge kóleminde áleýmettik kómek kórsetýge 11,5 milliard teńge tólendi, dep habarlaidy elorda ákimdiginiń resmi saity.
26 sáýirge áleýmettik kómekti 270 myńnan astam adam aldy. Ótinimderdi qala ákimdigi «Azamattarǵa arnalǵan úkimet» KEAQ jáne MÁSQ-men birlesip óńdeidi. Qalalyq shtab demalyssyz, kúsheitilgen tártipte jumys jasaýda. Memleket basshysynyń tapsyrmasymen 42,5 myń teńge kóleminde áleýmettik tólemdi alýshylar tizimi keńeitildi.
«Men dekrettik demalystaǵy jalǵyzbasty anamyn. Úsh bala tárbilep otyrmyn. Qazir memleket bizge kómektesýde. Men 42,5 myń teńge kóleminde tólem alýǵa ótinish bergen soń, telefonyma áleýmettik kómek taǵaiyndalǵany týraly habarlama keldi. Men dereý 20 sandyq karta málimetterin jiberip, aqshalai kómek aldym. Osynaý qiyn kúnderi bizdi nazardan tys qaldyrǵan joq. Sondai-aq, Biz birgemiz aktsiiasy aiasynda ákimdik Nur Otan partiiasymen birge azyq-túlik sebetterin taratty. Biz bul kómek úshin óte qýanyshtymyz», – deidi úsh balanyń anasy Ǵaliia Baitóreeva.
Tótenshe jaǵdai kezinde áleýmettik kómekti buryn resmi jumys istegen adamdar ǵana emes, ózin-ózi jumyspen qamtyǵan, bir jyldan beri dekrettik demalystaǵy áielder, sondai-aq stýdentter alady.
Buryn habarlanǵandai, 42,5 myń teńge kóleminde áleýmettik járdemaqy alýǵa ótinishterdi «Elektrondy úkimet» veb-portaly, telegrambot egov.kz nemese 42500.enbek.kz saity arqyly onlain-rejimde berýge bolady.
Ótinimdi berý ádisteri barynsha jeńildetilgen. Elbasy tapsyrmasy boiynsha 50 myń teńge kóleminde áleýmettik kómekti 14,5 myńǵa jýyq qala turǵyny aldy. Onyń jalpy somasy 724 mln. teńgeni quraidy. Atalǵan kómekti taǵy 28 myń adam alady, al bul 1,4 mlrd. teńgeni quraidy. Osy kómek alatyndar sanatyna az qamtylǵan otbasylar, múgedekter (1,2-shi toptaǵy múgedekter, múgedektigi bar zeinetkerler, AÁK alýshylar), múgedek balaǵa kútim jasaýshy tulǵalar (AÁK alýshylar), zeinetkerler (eń tómengi zeinetaqy alýshylar), jetimder, UOS qatysýshylary men múgedekteri, olarǵa teńestirilgen azamattar jáne tyl ardagerleri.
Sonymen qatar, basqa da áleýmettik qoldaý sharalary kórsetilýde. Atap aitqanda, ataýly áleýmettik kómek, azyq-túlik paketin berý túrindegi kepildendirilgen áleýmettik kómek, meditsinalyq maskalar jáne basqa da qorǵanysh zattary taratylýda.
