Elorda turǵyny 130 mln teńge bolatyn bitkoinderin belgisiz bireý zańsyz iemdengenin málim etken, dep habarlaidy QazAqparat Nur-Sultan qalalyq Politsiia departamentiniń baspasóz qyzmetine silteme jasap.
Alaiaqtyq faktisimen QR Qylmystyq kodeksiniń 190-baby 4-bóligi boiynsha sotqa deiingi tergeý bastaldy. Jedel-izdestirý sharalary barysynda kúdikti retinde elordanyń 37 jastaǵy turǵyny ustalǵan.
Tergeý málimetterine sáikes, er adam alaiaqtyq jolmen bitkoin ámiianyna kirgen jáne úsh ai boiy bitkoin jymqyryp kelgen. Qazirgi ýaqytta kúdikti tergeý izoliatorynda qamaýly jáne qylmystyq is sotqa joldandy. Kúdiktiniń múlki tárkilenip, 10 jylǵa deiin bas bostandyǵynan aiyrylýy múmkin.
Politsiianyń habarlaýynsha, sońǵy úsh jylda kriptovaliýtamen jáne onlain-birjadaǵy tabyspen bailanysty alaiaqtyq 10 esege artty. Bul rette zalal somasy júzdegen million teńgemen eseptelýde. Internet jelisinde jalǵan brokerler onlain-birjalarda aqsha ainaldyrý boiynsha óz qyzmetterin usynatyn kóptegen internet-resýrstar bar.
«Ondaǵy aldaý shemasy qarapaiym. Jappai taratylym arqyly alaiaqtar túrli veb-saittar men áleýmettik jelilerde kóp tabys ákeletin jarnamalyq usynystar jariialaidy. Shartty túrde, 100 dollardan 1000 dollarǵa deiin alýdy usynady. Sodan keiin qaskóiler brokerdiń oidan shyǵarylǵan saityn jáne paidalanýshyǵa qoljetimdi bolatyn jeke kabinetin qurady. Bul jeke kabinette alaiaqtar paidalanýshymen birdei shottyń qanshaǵa toltyrylǵanyn kóre alady», - delingen Politsiia departamentiniń habarlamasynda.
Ári qarai paidalanýshy foreks-birjada oinaýǵa kirisedi jáne uta bastaidy. Alaida, is júzinde bul «oiyndy» alaiaqtar qashyqtan baǵdarlamalap otyrady. Oiyn qyzyǵyna túsken paidalanýshy mol tabysqa keneldim dep odan da kóbirek aqsha salýǵa tyrysady. Al alaiaqtar barlyq qarajatty ózderi iemdenedi. «Jábirlenýshi» óziniń utysyn jeke kabinetten shyǵaratyn sátte broker qarajatty alýǵa uzaq ýaqyt ketetinin aitady. Bul protsess shamamen bir aiǵa sozylýy múmkin, sodan keiin brokermen bailanys úzilip, sait jabylady.
Politsiia azamattarǵa birjada aqsha tabý týraly usynystarǵa muqiiat qaraýdy usynady. Eń aldymen, dillerdiń litsenziiasy men basqa da ruqsat qujattary bar-joǵyn tekserý kerek. Muny internette jasaýǵa bolady.
«Eger sizde foreks-birjadaǵy baǵaly qaǵazdar naryǵynyń jumys isteýi salasynda arnaiy bilimińiz bolmasa jáne sizge jyldam tabys tabý usynylsa – saq bolýyńyz qajet. Jeke jinaqtaryńyzdy bir sátte joǵaltýyńyz múmkin, sondyqtan qaýip tóndirmeńiz», - dep eskertti politsiia.
