QR Premer-Ministri Asqar Maminniń tóraǵalyǵymen QR Prezidenti janyndaǵy Tótenshe jaǵdai rejimin qamtamasyz etý jónindegi memlekettik komissiianyń selektorlyq otyrysy ótti, dep jazady primeminister.kz.
Elimizdegi sanitarlyq-epidemiologiialyq jaǵdai týraly densaýlyq saqtaý ministri E. Birtanov, shekteý sharalaryn buzǵany úshin jaýapkershilikti qatańdatý týraly ádilet ministri M. Beketaev pen bas prokýror Ǵ. Nurdáýletov, respýblikalyq mańyzy bar qalalardaǵy ahýal týraly Nur-Sultan qalasynyń ákimi A. Kólginov, Almaty qalasynyń ákimi B. Saǵyntaev, Shymkent qalasynyń ákimi M. Áitenov, azyq-túlik qaýipsizdigi jáne áleýmettik mańyzdy azyq-túlik taýarlaryna baǵany belgileý týraly saýda jáne integratsiia ministri B. Sultanov, aýyl sharýashylyǵy ministri S. Omarov jáne memlekettik organdardyń basqa da basshylary baiandady.
Memlekettik komissiia biylǵy 28 naýryz kúngi saǵat 00.00-den bastap kelesi sharalardy qabyldaý arqyly Nur-Sultan jáne Almaty qalalarynda karantin rejimin kúsheitý týraly sheshimdi bekitti:
Azyq-túlik, dári-dármek satyp alýdy jáne jumysqa barýdy qospaǵanda, azamattardyń turǵyn úiden shyǵýyn shekteý;
Halyq kóp jinalatyn oryndardy jabý (saiabaqtar, skverler, jaiaý júretin kósheler, jaǵalaýlar, oiyn alańdary jáne t. b.);
Qoǵamdyq kólik jumysyn kezeń-kezeńmen shekteý;
Kóshelerde jáne basqa da qoǵamdyq oryndarda úsh adamnan artyq toptasyp jinalýǵa tyiym salý (otbasy múshelerinen basqa);
Kámelettik jasqa tolmaǵandardyń úlkendersiz syrtta júrýine tyiym salý.
Koronavirýstyq infektsiianyń taralýyna jol bermeý maqsatynda Shymkent qalasyndaǵy Abai aýdanynda «Táýelsizdikke 20 jyl» turǵyn úi alabynda úidi-úidi aralaýdy uiymdastyrýmen 14 kúnge sozylatyn karantin engiziledi.
Shymkent qalasynda sonymen qatar áýejaidyń, temirjol vokzaly jáne avtovokzaldyń, balabaqshalardyń jumysy toqtatylady. Halyq kóp jinalatyn jerler jabylady (saiabaqtar, skverler, jaiaý júrginshi kósheleri, oiyn alańdary t. b.). Qoǵamdyq tamaqtandyrý oryndarynyń jumysy saǵat 18.00-ge deiin shekteledi (saǵat 18.00-den saǵat 22.00-ge deiin úige jetkizýmen). Qoǵamdyq kólik qozǵalysy kezeń-kezeńmen shekteledi. Azyq-túlik dúkenderiniń, saýda ortalyqtary men kiim-keshek bazarlarynyń, qyzmet kórsetetin nysandardyń jumys rejimin shekteý Shymkent qalasynyń ákiminiń sheshimi boiynsha júzege asyrylady.
Úkimet basshysy Densaýlyq saqtaý ministrligine Ádilet ministrligimen birlesip shekteý sharalaryn engizý boiynsha tiisti aktini qabyldaýdy tapsyrdy.
Otyrysqa qatysýshylar sonymen qatar turǵyndardy áleýmettik mańyzy bar azyq-túlik ónimderimen qamtamasyz etý jáne olardyń baǵasyn turaqtandyrý, kóktemgi kanikýldan keiin mektep oqýshylarynyń qashyqtan oqýyn uiymdastyrý (biyl 6 sáýirden bastap), sondai-aq shetelde qalǵan, otanǵa oralýǵa nietti QR azamattaryna qoldaý kórsetý máselelerin qarastyrdy.
