Elordada paidalanýǵa berilgenine nebári 8 ai bolǵan baspananyń áli kúnge elektr jelisi de, sýy da bir júiege túspegen.
Qala turǵyny Natalia Bondarenkonyń aitýynsha, jaryqtyń esepteýish quraly istemeidi.
"Taiaýda elektr jelisi kompaniiasynyń ókili kelip, jaryqtan ajyratamyz, sizder 8 ai boiy aqsha tólemegensizder dedi. Biz ony kimge baryp, qaida tóleitinimizdi bilmeimiz, onyń ústine túbirtek te berilmeidi", - dep ashyndy ol.
Aitýynsha, sýdy da durystap bermeidi. Birde salqyn, birde ystyq sý aǵatyn kórinedi. Rettep otyrǵan adam joq, dep habarlady "Astana" arnasy.
Másele munymen shektelmeidi. Úidiń qabyrǵalary jarylyp, terezeleri shytynai bastaǵan.
Páterdiń qurylysyna jaýapty "Qazstroipodriad" kompaniiasynyń ókili kemshilikterdi erteńnen qaldyrmai túzeitinderin aitty.
"Biz jaýapkershilikten qashyp otyrǵan joqpyz. Kemshilikterdi túzetemiz. Abattandyrý máselesiniń bári erteń 100 paiyz sheshiledi. Erteń ózim osy jerde bolamyn", - dep ýáde berdi kompaniia basshysy Bekzat Pashaev.
Qalalyq turǵyn úi qorynyń ókili esepteýish quraldary bolǵanmen, páter ieleri kommýnaldyq mekemelermen kelisimshart jasaspaǵan dep otyr. Qalai bolǵanda da turǵyndar 8 aidyń shyǵynyn óteýge mindetti ekenin aitty.
"Olar osy kúnge deiin kelisimshartsyz turdy. Biraq sýdy, energiiany qoldanyp keledi. Osy kúnge deiingi qaryzdaryn tóleýge mindetti. Iaǵni, tólem tapsyrý-qabyldaý aktisine qol qoiǵan kúnnen bastalady", - dep túsindirdi qalalyq "Turǵyn úi qory" KMM baspasóz hatshysy Armanai Qabdeshova.
Bazynaly buqara elektr energiiasy úshin ár páterge qomaqty qarjy kelgenin aityp, shyryldady. Sózderine qaraǵanda bir ǵana elektr jaryǵy úshin árqaisysyna keminde jarty million teńgelik esepshot kelgen. Ony mundaǵy áleýettiń qaltasy árine kótermeidi. Óitkeni, bul baspanalarda áleýmettik az qamtylǵan otbasylar turyp jatyr.
