Kólik politseileri «Nur-Sultan-Taraz» baǵytyndaǵy áýe reisinen mas jolaýshyny túsirip aldy, dep habarlaidy "Ult aqparat" Kóliktegi politsiia departamentiniń baspasóz qyzmetine silteme jasap.
Departamenttiń málimetinshe, Taraz qalasy áýejaiyndaǵy Jelilik politsiia bólimshesiniń kezekshi bólimine dispetcherden «Nur-Sultan-Taraz» baǵytyndaǵy áýe reisiniń bortynda quqyqbuzýshy bar ekendigi týraly habarlama kelip tústi.
«Tekserý barysynda er adamnyń mas kúiinde ózin agressivti ustap, ekipaj múshelerin balaǵattap, bortserikterdiń eskertýine qulaq aspaǵandyǵy anyqtaldy. Jolaýshy áýe kemesi komandiriniń aktisi boiynsha reisten túsirilip, kezekshi bólimge jetkizildi. Ol Mańǵystaý oblysynyń 48 jastaǵy turǵyny bolyp shyqty.Meditsinalyq kýálandyrý qorytyndysyna sáikes, ol «ortasha dárejede» mas kúide bolǵan», delingen habarlamada.
Quqyqbuzýshyǵa qatysty QR ÁQBtK-niń 440-baby 1-bóligimen, iaǵni ishimdik ishý nemese qoǵamdyq orynǵa mas kúide kelý jáne QR ÁQBtK-niń 566-baby 1-bóligimen, iaǵni áýe kemesinde minez-qulyq qaǵidalaryn buzý boiynsha ákimshilik hattamalar toltyrylyp, 8 AEK mólsherinde ákimshilik aiyppul salyndy.
Sonymen qatar, oǵan qatysty usaq buzaqylyq faktisi boiynsha da úshinshi ákimshilik hattama toltyrylyp, protsessýaldyq sheshim qabyldaý úshin Taraz qalasynyń mamandandyrylǵan aýdanaralyq ákimshilik sotyna joldandy.
Aita keterligi, jyl basynan beri kólik politseileri túrli ákimshilik quqyq buzýshylyq úshin 19 094 azamatty, onyń ishinde ishimdik ishkeni jáne qoǵamdyq orynǵa mas kúiinde kelgeni úshin 1 935 azamatty ákimshilik jaýapkershilikke tartty.
