Elordalyq máslihat Nur-Sultan qalasynyń 2021-2023 jyldarǵa arnalǵan biýdjet jobasyn talqylaýdy bastady, dep habarlaidy "Ult aqparat".
Nur-Sultan qalasynyń Strategiialyq jáne biýdjettik josparlaý basqarmasynyń basshysy Qaisar Mańqaraev qala máslihatynyń turaqty komissiiasynyń otyrysynda biýdjettik joba týraly baiandama jasady.
2021-2023 jyldarǵa arnalǵan boljam boiynsha, naqty kirister 1 trln 1 mlrd 376 mln teńge bolady. Onyń ishinde 2021 jyly - 319,7 mlrd teńge, 2022 jyly - 332,3 mlrd teńge, 2023 jyly-349,4 mlrd teńge túsim boljanǵan.
«2021 jyly naqty kiris 319,7 mlrd teńge deńgeiinde baǵalanyp otyr, munda 2020 jyldyń biýdjetimen salystyrǵanda 5%-ǵa ósim bar. Aldaǵy úsh jyldyq kezeńdegi salyqtyq túsimder elordanyń naqty kirister kóleminiń 98%-ǵa jýyǵyn qamtamasyz etedi. 2021-2023 jyldary naqty kirister túsiminiń jyl saiynǵy ósimi 5%-dy nemese shamamen 15 mlrd teńgeni quraidy», - dedi Qaisar Mańqaraev.
Onyń aitýynsha, jergilikti úsh jyldyq biýdjettiń jalpy shyǵyndary tiisinshe 1 trln 1 mlrd 376 mln teńge somasynda josparlanyp otyr.
«Qala biýdjetine respýblikalyq biýdjetten úsh jyldyq kezeńge 63,3 mlrd teńge somasynda nysanaly transfert kózdelgen, onyń ishinde 2021 jyly - 44,2 mlrd teńge, 2022 jyly - 12,6 mlrd teńge jáne 2023 jyly - 6,5 mlrd teńge. 2020-2022 jyldarǵa arnalǵan jalpy sipattaǵy transfert kólemi týraly zańǵa sáikes, 2021 jyly respýblikalyq biýdjetke 34,2 mlrd teńge, 2022 jyly - 38,5 mlrd teńge mólsherinde alynýy tiis. Biyl TJ rejiminiń engizilýine bailanysty, respýblikalyq biýdjetti naqtylaý aiasynda menshikti kirister esebinen respýblikalyq biýdjetke keri transferttermen 7,7 mlrd teńge aýdaryldy. 2021 jyly jergilikti biýdjetten aýdarym jasaý kólemi 15,4 mlrd teńge bolmaq», - dep atap ótti basqarma basshysy.
Sonymen birge, Memleket basshysynyń azamattardyń ómir súrý sapasy men áleýmettik ál-aýqatyn arttyrý jónindegi 2021-2023 jyldarǵa arnalǵan bastamalar tapsyrmalaryn iske asyrý sharalary josparlanǵan.
Strategiialyq jáne biýdjettik josparlaý basqarmasynyń habarlaýynsha, Nur-Sultan qalasy ákimdiginiń apparatyna 5 mlrd 538 mln teńge qarastyrylǵan, onyń ishinde 2021 jyly - 1 mlrd 847 mln teńge bólinedi.
