Elordanyń bas sanitar dárigeri Sarhat Beisenova qaladaǵy epidemiologiialyq jaǵdaidy baiandady, dep habarlaidy QazAqparat.
«Elordada COVID-19 boiynsha epidemiologiialyq jaǵdai qolaisyz bolyp qala beredi. Bes ai boiy qala «qyzyl» aimaqta turyp, sońǵy 13 kúnde infektsiialyq statsionarlar júktemesi 70%-dan asyp jáne 100 myń turǵynǵa shaqqanda tósek-orynnyń tolý kórsetkishi 200-den joǵary bolǵandyqtan Nur-Sultan «qoiý qyzyl aimaqta» boldy. Kesheden beri infektsiialyq statsionarlar júktemesi 69%-ǵa túsip, elorda taǵy da «qyzyl aimaqqa» aýysty», - dedi Beisenova elorda ákimdiginde ótken brifingte.
Spikerdiń aitýynsha, elordada biylǵy maýsymnyń ekinshi onkúndiginen bastap, delta shtamynyń taralýynan epidemiologiialyq jaǵdai nasharlady.
«Maýsym-shilde ailary kezeńinde jyl basynan bergi barlyq syrqattanýshylyqtyń 55%-y tirkeldi. Shilde aiynda aýrýshańdyq deńgeii mamyr aiyndaǵy kórsetkishten 2,4 esege, maýsym aiynan 2,3 esege artty. Biylǵy shildede pandemiia bastalǵannan beri 100 myń turǵynǵa shaqqanda eń joǵary aptalyq kórsetkish tirkeldi jáne ol 915,9-dy qurady. Jaǵdailardyń ortasha táýliktik tirkelýi maýsym aiynda 388-den shilde aiynda 1200-ge deiin ósti. Sońǵy 19 kúnde táýligine 1500-den astam jaǵdai tirkelgen», - dedi Beisenova.
