Elordada sý tasqynyna qarsy sharalar kúsheitildi, dep habarlaidy QazAqparat qala ákimdiginiń baspasóz qyzmetine silteme jasap.
Komissiia qala aýmaǵynda sý basý qaýpi bar 30-dan astam ýchaskeni anyqtady. Kóktemgi sý basý qaýpiniń aldyn alý júrgizilip jatyr. Sondai-aq aryqty, nóserlik káriz júielerin tazartý jalǵasýda.
Budan basqa, Esil ózeniniń arnasyn (Sh. Beisekova kóshesindegi kópirge deiin aýdan) keńeitý aiaqtaldy. Qazir arnany qaita jańartý, sý retteitin bóget salý qolǵa alynǵan.
«Sý tasqynyna qarsy is-sharalardy kúsheitý qajet. Eldi mekenderge basa nazar aýdarýymyz kerek. Jeke sektor turǵyndaryna úiiniń shatyryn jáne irgeles aýmaqty qardan ýaqytyly tazalaý týraly habarlama berilip jatyr. Turǵyndar aýlasyndaǵy qardy jol jiegine shyǵaryp jinaǵan kezde ǵana kommýnaldyq qyzmetter alyp ketedi. Eldi mekender erekshe baqylaýda. Aitalyq, Ilinkada bóget nyǵaityldy, al «Kóktal-1» eldi mekeninde ýaqytsha qum bóget salyndy. «Óndiriste» ózen arnasyn qalpyna keltirý jumysy júrgizilýde, bul ózen sýynyń kedergisiz ótýin qamtamasyz etedi«, - dedi qala ákimi Altai Kólginov.
Qala men shetkeri aimaqtardy sý tasqynynan qorǵaityn kontregýliatordyń jumys rejimi bekitildi. Kóktemgi sý tasqynyn qaýipsiz ótkizýdi qamtamasyz etý maqsatynda Maibalyq kólinen «Nura-Esil« kanalyna deiin jumys istep turǵan arnanyń ótkizý qabileti arttyrylady.
Kommýnaldyq qyzmetter kúsheitilgen rejimde qar tazalaýǵa kóshti. Búginde qala aýmaǵynan 4,6 mln tekshe metr qar shyǵaryldy. Ótken qysta shyǵarylǵan qar kólemi eki ese az boldy. Byltyr tek 1,9 mln tekshe metr qar shyǵaryldy.
«Qazgidromet« RMK gidrometeorologiialyq ortalyǵynyń direktory Marina Shmidttiń aitýynsha «byltyr qysta jaýǵan qardyń kólemi - 102 mm bolsa, biyl qysta qarasha men aqpan aralyǵynda jaýǵan qar kólemi 173 mm-ge jetken. Bul shamamen normadan eki ese joǵary» (bir aidyń normasy -15 mm bolsa, 15 kúnde 34 mm qar jaýdy).
Sý tasqynyna qarsy sharalar boiynsha turǵyndar myna telefondar arqyly habarlasa alady:
«Saryarqa» aýdany: 8-778-710-91-00, «Baiqońyr» aýdany: 8-702-348-82-88, 8-701-999-22-89, «Almaty» aýdany: 8-707-795-13-88. Jelezodorojnyi, Óndiris eldi mekeni: 8-778-669-97-70, qosymsha tel. 8-707-878-11-31, 8-701-407-80-52.
Michýrino, Kúigenjar, Internatsionalnyi: 8-707-588-72-27, qosymsha tel. 8-701-715-62-30. Ońtústik shyǵys shaǵyn aýdany boiynsha: 8-702-4444-52-99, qosymsha tel. 8-702-905-59-95, 8-777-077-77-89. «Esil» aýdany: 8-701-121-25-35 («Prigorodnyi», «Zarechnyi», «Telman»),8-778-176-31-11 («Úrker», «Shyǵys Ilinka»).
