Nur-Sultan qalasynda Qazaqstannyń halyq jazýshysy, memleket jáne qoǵam qairatkeri Ábish Kekilbaiulynyń 80 jyldyǵyna orai jazýshynyń atyna kóshe berildi, – dep habarlaidy «Ult aqparat».
Jazýshynyń esimine kóshe berý saltanatyna Memlekettik hatshy Qyrymbek Kósherbaev pen Nur-Sultan qalasynyń ákimi Altai Kólginov qatysty. Kóshe astananyń sol jaǵalaýynda EKSPO aýmaǵyna jaqyn mańda ornalasqan. Máńgilik el kóshesimen qiylysady.
«Búgingi kún – úlken qýanyshty sát dep oilaimyn. Óitkeni, Tuńǵysh Prezidentimiz – Elbasynyń usynysymen osy Eýraziianyń tórinde Saryarqanyń tósinde jańa astanamyz salyndy. Elbasy kótergen osy bastamasyna tilegin qosyp, shyn júregimen nietin bildirip, qoldaý kórsetken Ábish aǵanyń atynda kóshe ashylyp jatyr. Biz Alla taǵalaǵa «Ábekeńdi alyp kettiń» dep ókpe aita almaimyz. Qazaqta osyndai uly abyz adam bolǵany úshin rahmet aitaiyq. Eki ǵasyrdyń toǵysynda, táýelsizdiktiń eleń-alań kezeńinde Tuńǵysh Prezidentimiz Nursultan Ábishuly, Ábish Kekilbaiuly sekildi uly tulǵalardyń bolýy – bizdiń qazaqqa Allanyń kórsetken qoldaýy, jaqsylyǵy dep esepteimiz. Dańǵyldyń boiynda júretin óskeleń urpaq Ábish Kekilbaiulynyń kim ekenin, osy Nur-Sultan qalasynyń ne úshin salynǵanyn eskerip, táýelsizdigimizdi baiandy etýge úlesterin qosa bersin dep tileimiz», - dedi jiyn barysynda Qyrymbek Kósherbaev.
Memlekettik hatshy óz sózinde saltanatty sharaǵa kelgen jazýshynyń jary Klara Jumabaiqyzyn quttyqtady. Óz kezeginde Nur-Sultan qalasynyń ákimi Altai Kólginov elorda kósheleriniń birine Ábish Kekilbaiulynyń esimi berilýin tarihi oqiǵaǵa teńedi.
«Elbasynyń qasynda jyldar boiy serik bola júrip, qazaq elin Máńgilik el etýge úlken eńbek etken aǵamyz máńgi esimizde bolary sózsiz. Ábish aǵamyzǵa búgin as berilip, keshke eske alý keshi ótedi. Bul - memleketimizdiń mádeniet qairatkerlerine, jazýshylarǵa, qazaq eliniń birligin kóterip júrgen azamattarǵa degen úlken qurmet. Sondyqtan, búgingi is-shara barshamyzǵa qutty bolsyn», - dedi qala basshysy.
