Nur-Sultan qalasyna kirýge nemese shyǵýǵa ázirshe ýaqyt bar. Bul týraly Ortalyq kommýnikatsiialar qyzmetiniń alańynda ótken Nur-Sultan qalasynda koronavirýstyń taralýyn boldyrmaý jáne infektsiia boiynsha aǵymdaǵy jaǵdaiǵa arnalǵan baspasóz konferentsiiasynda aityldy, dep habarlaidy QazAqparat.
«Qalaǵa kirip-shyǵýǵa ázirshe ýaqyt bar. Aldaǵy 72 saǵat avia jáne temir jol qatynastary arqyly qaladan ketýge nemese qalaǵa kelýge múmkindik berilip otyr. Osy jyldyń 22 naýryzynan bastap barlyq sanattaǵy turǵyndarǵa qala aýmaǵynan shyǵýǵa jáne qala aýmaǵyna kirýge tolyq shekteý qoiylady. Kez kelgen kólik qatynastarynyń tranzittik tamysaldaýlary Nur-Sultan qalasy aýmaǵyna toqtalmai júrgiziledi, iaǵni jolaýshylar poiyzdary qala arqyly ótedi, biraq toqtamaidy. Qala aýmaǵyn basyp ótetin nemese azyq-túlik tasymaldaityn kólikter arnaiy jasyl dálizben ǵana qatynaidy», - deidi Nur-Sultan qalasy ákiminiń orynbasary Bahtiiar Máken.
Onyń aitýynsha, atalǵan sharttardyń oryndalýy úshin birqatar talaptar kúsheitiledi.
«Birinshiden, infektsiianyń taralýyna jol bermeý úshin arnaiy óńirlik jedel shtaby kúrdeli jumys atqaryp jatyr. Ol táýlik boiy qyzmet etedi. Ekinshiden, tótenshe jaǵdai kezinde karantinge sáikes halyq pen sharýashylyq sýbektileriniń qyzmetin retteý úshin qalalyq shtabtyń arnaiy sheshimi qabyldandy. Úshinshiden, karantin jaǵdaiynda qalalyq azyq-túlik qaýipsizdigin qamtamasyz etý úshin arnaiy is-sharalar jospary iske asýda. Qosymsha azyq-túlik taýarlaryn jetkizý máselesi óńirlermen birlesip otyryp sheshildi. Qazirgi tańda halyqqa eń birinshi qajetti áleýmettik jáne tutynýshylyq taýarlar qory jetkilikti. Saýda úileri men qoimalarda artyq kólemde qor jinaqtalǵan. Tórtinshiden, QR Densaýlyq saqtaý ministrliginiń tiisti sharalaryna sáikes, «A» jáne «B» josparyndaǵy is-qimyl algoritmine sáikes kornavirýs infektsiiasyn juqtyrǵan adamdarmen bailanysta bolǵan tulǵalarǵa arnaiy jatatyn oryndary men karantin statsionarlary keńeitildi. Eger «S» josparyna sáikes bolatyn bolsa, qosymsha jatatyn oryndardy qala boiynsha jasaqtadyq. Besinshiden, farmatsevtika qaýymdastyǵy jáne Taýarlar men kórsetiletin qyzmetterdiń sapasy men qaýipsizdigin baqylaý departamenti arasyndaǵy baǵany retteý boiynsha, sondai-aq dárigerlik jáne meditsinalyq taýarlardy jetkizý boiynsha ózara yntymaqtastyq memorandýmǵa qol qoiyldy. Memorandýmǵa sáikes tiisti jumystardy atqaryp jatyrmyz», - deidi ol.
