Nur-Sultan qalasyn zararsyzdandyrý úshin ushaqpen dári shashylady delingen aqparat jalǵan. Bul týraly QR DSM Taýarlar men qyzmetterdiń sapasyn jáne qaýipsizdigin baqylaý komitetiniń Telegram paraqshasynda taratylǵan aqparatta aitylǵan, dep habarlaidy "Ult aqparat".
«Whatsap toptarynda taraǵan saǵat 23-00 men tańǵy saǵat 5-00 aralyǵynda Nur-Sultan qalasynda zararsyzdandyrý úshin tikushaqpen dári shashylady jáne azamattardan tereze men balkondardy ashýǵa, sonymen qatar kósheden 23-00-den keiin shyǵýǵa tyiym salynady delingen aqparat jalǵan. Qasaqana jalǵan aqparat taratqany úshin QR zańnamasynda qylmystyq jaýapkershilik kózdelgenin eske salamyz. Azamattardy tek resmi habarlarǵa senip, shyndyqqa janaspaityn ósek pen aqparatty taratpaýǵa shaqyramyz», - dep atap ótedi komitetten.
Vedomstvo málimetinshe, Qazaqstanda jáne álemde koronavirýs infektsiiasynyń taralýyna qatysty senimdi aqparatttar QR Densaýlyq saqtaý ministrliginiń, QR DSM Taýarlar men qyzmetterdiń sapasyn jáne qaýipsizdigin baqylaý komitetiniń resmi saittarynan, sondai-aq atalǵan organdardyń áleýmettik jelilerdegi paraqshalarynan, sondai-aq táýlik boiy jumys isteitin 1406 Call-ortalyǵynan bilýge bolady.
