Nur-Sultan qalalyq Kásipodaq ortalyǵy jumys berýshilerge tótenshe jaǵdai men karantin kezinde qaýip-qaterge qarsy kúsh biriktirý maqsatynda úndeý joldady, dep habarlaidy Nur-Sultan qalasy ákimdiginiń resmi saity.
«Jumysshylardyń jappai bosatylýyna, jalaqy boiynsha bereshek pen áleýmettik aýdarymdardyń tólenbeýine, jalaqynyń tómendeýine, eńbek jaǵdaiynyń negizsiz nasharlaýyna jol bermeý qajet. Qyzmetkerlerdi jeke qorǵanysh quraldarymen qamtamasyz etý, jumys oryndary men keńselerde qaýipsiz jaǵdailar jasaý, jumys rejimin qazirgi zamanǵy bailanys quraldaryn qoldana otyryp, qashyqtan jumys isteý jolymen qalyptasqan jaǵdaiǵa beiimdeýimiz kerek», - dedi Nur-Sultan qalasynyń kásipodaq ortalyǵynyń tóraǵasy Tastanbek Esentaev.
Sondai-aq, ol virýstyń ýaqtyly anyqtalýy jáne onyń taralýyn boldyrmaýda aýyzbirshilik tanytyp, meditsinalyq qyzmetterdiń jumysyna kómektesýge shaqyrdy.
«Qazir bizdiń elimiz álemniń kóptegen memleketteri siiaqty kúrdeli kezeńdi bastan ótkerýde. Nur-Sultan qalalyq Kásipodaq ortalyǵy kásipodaqtyń 125 myńǵa jýyq múshesin biriktire otyryp, «shuǵyl bailanys» jelisin ornatty. Oǵan kásipodaq músheleri ǵana emes, jumys berýshiler men ózin-ózi jumyspen qamtyǵan azamattar da júgine alady. Búgingi kúni 580-den astam ótinish tústi», – dedi T.Esentaev.
Onyń aitýynsha, «shuǵyl bailanys» jelisine negizinen jumysshylardy jeke qorǵanysh quraldarymen qamtamasyz etý, karantin kezinde eńbekaqy tóleý, muqtaj adamdarǵa kómek kórsetý, áleýmettik saqtandyrý týraly saýaldar joldanǵan.
«Elordanyń kásipodaq uiymdarynyń qyzmetkerleri túsindirý jumystaryn ótkizip, týyndaǵan máseleler boiynsha usynystar berýde», – dedi kásipodaq basshysy.
