Elorda ákimdiginiń apparattyq keńesinde ákim Altai Kólginov kadrlyq aýys-túiis týraly aitty. Basqa jumysqa aýysýyna bailanysty qala ákiminiń orynbasary Arman Turlybek qyzmetinen bosatyldy, dep habarlaidy astana ákimdiginiń resmi saity.
Nur-Sultan basshysynyń ókimimen Qaisaǵaliev Altynbek Keńesuly qala ákiminiń orynbasary bolyp taǵaiyndaldy. Ol salynyp bitpegen turǵyn úiler úleskerleriniń problemasy, elordany abattandyrý, kógaldandyrý, sanitarlyq tazalaý jáne qar kúreý máselelerimen ainalysatyn bolady. Sondai-aq kommýnaldyq sharýashylyq, avtomobil joldarynyń qurylysy men infraqurylymy jáne qorshaǵan ortany qorǵaý da jańa orynbasardyń qaraýynda bolmaq.
Altynbek Qaisaǵaliev L.N. Gýmilev atyndaǵy Eýraziia ulttyq ýniversitetin "qurylysshy" mamandyǵy boiynsha, Qazaq ekonomika, qarjy jáne halyqaralyq saýda ýniversitetin "memlekettik jáne jergilikti basqarý" mamandyǵy boiynsha bitirgen. "Bolashaq" baǵdarlamasynyń túlegi, Ulybritaniiadaǵy Bat ýniversitetiniń menedjment, innovatsiia jáne tehnologiialar salasyndaǵy jaratylystaný ǵylymdarynyń magistri.
Ár jyldary Prezident ákimshiliginiń memlekettik baqylaý jáne uiymdastyrý-aýmaqtyq jumys bóliminiń konsýltanty, inspektory, Nur Otan partiiasy ortalyq apparaty hatshylyǵynyń meńgerýshisi, Oral qalasy ákimi apparatynyń basshysy, Almaty qalasy kásipkerlik jáne indýstrialdy-innovatsiialyq damý basqarmasy basshysynyń orynbasary, Oral qalasy ákiminiń orynbasary, Batys Qazaqstan oblysy qurylys basqarmasynyń basshysy qyzmetin atqarǵan.
