Biyl elorda ákimdigi iesiz qańǵyp júrgen it pen mysyqty aýlap, asyraýǵa 120 million teńge jumsamaq, dep habarlaidy «Habar 24».
Árine, aýyz toltyryp aitarlyqtai soma. "Osynsha qarjyny kim, qaida, qalai jumsaidy" degen suraqty arna tilshileri anyqtaýǵa tyrysqan.
Kamera men mikrofon ustap tótennen kelgen tilshilerdi «Astana veterinalyq qyzmetiniń» mamandary mekeme aýmaǵyna kirgizbegen. "Jóndeý júrip jatyr" degen syltaýdy jeleý etip, arnaiy press-týrǵa shaqyramyz dep shyǵaryp salǵan.
«Negizinde bólingen qarjyny júieli jaratatyn bolsa, 300 emes, 700 itti de jeke úishikte ustaýǵa bolar edi. Sondai-aq myna aýmaqty ýaqytyly tazalap, it pen mysyqtyń tamaǵy men sýyna jetkizýge bolady. Ashtan buralǵan buralqy itterdi tamaqtandyrý úshin kúnine 4-5 qap jarma satyp alamyz. Salmaǵy shamamen 100 kelidei bolady. Oǵan qosa, dúkenderden eti sylynǵan qur súiekti ákelip, jarma qosyp qainatamyz. Osylaisha, táýligine 700 litr botqa istep beremiz», - deidi eriktiler qozǵalysynyń jetekshisi Iýliia Pedchenko.
«Astana veterinarlyq qyzmet» mekemesi mamandarynyń aitýynsha, júzdegen ittiń táýliktik azyǵy úsh qap jem. Degenmen, eriktiler qamaýdaǵy it-mysyq bizdiń arqamyza aram qatpai júr deidi. Sebebi qańǵybas itterge tamaq alý úshin qaltalarynan aqsha shyǵarady.
Elimizdiń azamattyq kodeksi boiynsha iesiz múlikke eki ai ishinde eshkim qol suǵa almaidy. Bul zań qańǵybas itterge de qatysty. Sondyqtan qaraýsyz kóshe kezip júrgen it-mysyq munda 60 kún qamaýda bolady. Osy aralyqta iesi tabylmasa, ary qaraiǵy taǵdyry sheshiledi.
«Mekemeniń aýlasyna basyp kirip, úsh itti kóz aldymyzda atyp tastady. Biz olardy kúnde tamaqtandyryp, tipti úishik salyp bergen edik. Olar bizge úirenip, nysandy kúzetip júrgen bolatyn. Alaida «Astana veterinarlyq qyzmeti» mamandaryna olardy jairatyp salyp, bólingen aqshany qaltaǵa basý tiimdi boldy dep oilaimyn», - deidi Nur-Sultan qalasynyń turǵyny Ekaterina Sokolova.
Álemdik tájiribege súiensek, damyǵan elderde buralqy it pen mysyqty baqylaityn, zań turǵysynan qorǵaityn jáne atqarýshy organdar bar. Árqaisy óz qyzmetine jaýappen qaraidy. Eger bizde de qańǵybas haiýandardy aýlaý men asyraý máselesin júieli jolǵa salmasa, buralqy it pen mysyqtyń kóbeimese, kemimeitini belgili.
