«Nur Otan» partiiasynyń tóraǵasy Nursultan Nazarbaev Baýyrjan Baibekti qabyldady, dep habarlaidy "Ult aqparat" Elbasynyń baspasóz qyzmetine silteme jasap.
Kezdesýde «Ózgerister joly: Ár azamatqa laiyqty ómir!» sailaýaldy baǵdarlamasyn ári qarai júzege asyrý máseleleri, sondai-aq sailaýaralyq kezeńdegi partiianyń jumys jospary talqylandy.
– Parlament Májilisi men barlyq deńgeidegi máslihattar depýtattarynyń sailaýy ótti. «Ózgerister joly: Ár azamatqa laiyqty ómir!» atty sailaýaldy baǵdarlamany qabyldadyq. Endi ony júzege asyrý máselesine kóńil bólý kerek, – dedi Elbasy.
Qazaqstannyń Tuńǵysh Prezidenti partiianyń pandemiia kezinde halyqty qoldaýǵa baǵyttalǵan jumysynyń mańyzdylyǵyn atap ótti.
– Pandemiia halyqtyń ál-aýqaty men bizneske keri áserin tigizip jatyr. Sol sebepti bizdiń mindetimiz – jurtshylyqqa jan-jaqty qoldaý kórsetýdi jalǵastyrý, – dedi Nursultan Nazarbaev.
«Nur Otan» partiiasy Tóraǵasynyń birinshi orynbasary Elbasyǵa partiianyń sailaýaldy ýádelerin oryndaý jónindegi Respýblikalyq jol kartasyn tanystyryp, onda qamtylǵan indikatorlardyń 24 paiyzyn biyl iske asyrý josparlanyp otyrǵanyn aitty.
– Respýblikalyq Jol kartasy Májilistegi fraktsiiada Premer-Ministrdiń, Úkimet músheleriniń jáne depýtattardyń qatysýymen talqylandy. Ony júzege asyrý úshin 1700 kórsetkish basshylyqqa alyndy. Biyl bul indikatorlardyń 24 paiyzyn oryndaý josparlanyp otyr. Óńirlerde sailaýaldy baǵdarlamany iske asyrý boiynsha 216 jol kartasy talqylandy. Sonyń aiasynda 80 myń indikatorǵa qol jetkizý kózdelgen. Aldaǵy bes jylda partiianyń sailaýaldy ýádeleri tolyq oryndalady, – dedi B.Baibek.
