QR Premer-Ministri Asqar Mamin «Nur Otan» partiiasynyń sailaýaldy baǵdarlamasynyń Jol kartasyn iske asyrý jónindegi shtab otyrysyn ótkizdi. Bul týraly primeminister.kz saity habarlady.
Shtab otyrysynda qazaqstandyq taýarlar men qyzmetterdiń shikizattyq emes eksportynyń kólemin arttyrý, mádeniet obektileri men mektepter salý máseleleri qaraldy.
Saýda jáne integratsiia ministriniń mindetin atqarýshy Qairat Tórebaev, Indýstriia jáne infraqurylymdyq damý ministriniń mindetin atqarýshy Qaiyrbek Óskenbaev, Aýyl sharýashylyǵy ministriniń mindetin atqarýshy Erbol Qarashókeev, Ulttyq ekonomika ministriniń mindetin atqarýshy Timýr Jaqsylyqov «Nur Otan» partiiasynyń sailaýaldy baǵdarlamasynda alǵa qoiylǵan kórsetiletin qyzmetter men taýarlardyń shikizattyq emes eksportynyń kólemin 2025 jylǵa qarai 41 mlrd dollarǵa deiin 2 esege arttyrý jónindegi mindetti iske asyrý barysy týraly baiandady. Biyl osy kórsetkishtiń 29,2 mlrd dollarǵa deiin ósýin qamtamasyz etý kózdelgen.
Osy jyldyń 5 aiynyń qorytyndysy boiynsha Qazaqstannyń syrtqy taýar ainalymy ótken jyldyń sáikes kezeńimen salystyrǵanda 1% artyp, 36,4 mlrd dollardy qurady. Bul rette shikizattyq emes taýarlar eksportynyń kólemi 23,4% ósip, 7,2 mlrd dollardy qurady. Eń joǵary ósim metallýrgiiada 27,5%, qurylys indýstriiasynda 25,8% farmatsevtika salasynda 18,4%, himiia ónerkásibinde 4,6% deńgeiinde baiqalady.
AÓK óńdelgen óniminiń eksporty ótken jyldyń sáikes kezeńimen salystyrǵanda 10,8% ósip, 545,8 mln dollar nemese AÓK eksportynyń jalpy kóleminiń 33% qurady. Eksport qurylymynda un men makaron ónimderi, ósimdik mailary, maqta talshyǵy, et jáne sút ónimderi, konditerlik ónimder sekildi taýarlar basym.
Shikizattyq emes taýarlar men kórsetiletin qyzmetterdiń eksportyn arttyrý maqsatynda eksporttaýshylardy memlekettik qoldaý sharalary – jeńildikpen nesie berý jáne saqtandyrý, eksporttaýshylar shyǵyndarynyń bir bóligin óteý, eksporttyq akseleratsiia, elektrondyq platformalarǵa shyǵarý jáne t. b. iske asyrylyp jatyr.
Úkimet basshysy indýstriia jáne infraqurylymdyq damý, aýyl sharýashylyǵy ministrlikterine ishki naryqty jáne eksporttyq áleýetti damytýdy qamtamasyz etýge múmkindik beretin óńdeý ónerkásibi ónimderi óndirisiniń jetkilikti kólemin qamtamasyz etýdi tapsyrdy.
Syrtqy ister, saýda jáne integratsiia ministrlikterine salalyq memlekettik organdarmen eldik eksporttyq baǵdarlamalardyń jobalaryn kelisý jáne otandyq ónimderdi syrtqy naryqtarda ilgeriletý boiynsha belsendi jumystardy bastaý tapsyryldy.
Eńbek jáne halyqty áleýmettik qorǵaý ministri Serik Shápkenov, Mádeniet jáne sport ministriniń mindetin atqarýshy Nurǵisa Dáýeshov, Ulttyq ekonomika ministriniń mindetin atqarýshy Timýr Jaqsylyqov, Túrkistan oblysynyń ákimi Ómirzaq Shókeev, Shymkent qalasynyń ákimi Murat Áitenov, Jambyl oblysy ákiminiń orynbasary Talǵat Mamaev «Nur Otan» partiiasynyń sailaýaldy baǵdarlamasynda alǵa qoiylǵan 2025 jylǵa deiin 259 mádeniet nysanyn salý boiynsha mindetterdiń iske asyrylý barysy týraly baiandady.
Jumystardy qarjylandyrý «Jumyspen qamtý jol kartasy», «Aýyl – el besigi», «Biznestiń jol kartasy» baǵdarlamalary, jergilikti biýdjet, memlekettik-jekeshelik áriptestik jáne basqa da kózder esebinen júzege asyrylady.
Biyl elimizde 89 mádeniet nysanynyń qurylysy josparlanýda, onyń ishinde 12 – Túrkistan oblysynda, 10 – Jambyl oblysynda, 9 – Almaty oblysynda, 7 – Shyǵys Qazaqstan jáne Soltústik Qazaqstan oblystarynda, 6-dan – Aqtóbe jáne Qyzylorda oblystarynda, 5-den – Aqmola, Qaraǵandy jáne Pavlodar oblystarynda, 4-den – Batys Qazaqstan jáne Mańǵystaý oblystarynda, 3-den – Atyraý jáne Qostanai oblystarynda, 2 – Almaty qalasynda, 1 – Nur-Sultan qalasynda.
Biyl 200 mektep salý josparlanýda, onyń ishinde nysanaly qurylys esebinen – 163 mektep, MJÁ tetigi esebinen – 6 mektep, jekemenshik mektepter jelisin damytý esebinen 31 mektep paidalanýǵa beriledi. Biyl 200 mekteptiń ashylýy apatty mektepterdiń, úsh aýysymdy mektepterdiń problemasyn basym tártippen sheshýge jáne oqýshy oryndarynyń tapshylyǵyn qysqartýǵa múmkindik beredi.
Mektepter qurylysynyń kestesin iske asyrý boiynsha jumystardyń barysy týraly Nur-Cultan qalasynyń ákimi Altai Kólginov, Almaty oblysynyń ákimi Amandyq Batalov, Túrkistan oblysynyń ákimi Ómirzaq Shókeev tyńdaldy.
Premer-Ministr «Nur Otan» partiiasynyń sailaýaldy baǵdarlamasynyń Jol kartasyn iske asyrý máseleleri Úkimettiń erekshe baqylaýynda ekenin atap ótti. «Nur Otan» partiiasynyń sailaýaldy baǵdarlamasyn iske asyrý boiynsha barlyq ortalyq memlekettik jáne jergilikti atqarýshy organdardyń belsendi ári júieli jumysy qajet», — dedi Mamin.
