Nur Otan partiiasynyń Shymkent qalalyq filialy qazir shtattyq rejimde jumys istep tur, dep habarlaidy Sputnik Qazaqstan tilshisi.
Aita ketsek, áleýmettik jelilerde Shymkentte bas kótergen arystyqtardyń videosy taraǵan bolatyn. Onda narazy adamdar qaladaǵy Nur Otan partiiasy filialynyń aldynda ilýli turǵan týdy julyp alyp, ǵimaratqa basyp kirmek bolady.
Osyǵan bailanysty partiianyń Shymkent qalalyq filialy tóraǵasynyń birinshi orynbasary Bahadyr Narymbetov video arqyly túsinikteme berdi. Aitýynsha, qazir partiia filialy shtattyq rejimde jumys istep jatyr.
"Nur Otan partiiasynyń Shymkent qalalyq filialynda bári durys. Baǵana jiyrma shaqty buzaqy jigit kelip, osy jerde zańsyz áreketter jasaǵan. Olarmen sóilesip, jaǵdaidy túsindirip, talap-aryzyn tyńdaǵannan keiin, olar basqa organdarǵa shaǵymdanamyz dep ketip qaldy. Ǵimaratta qazir buzaqylyq, qiratý, ondai eshteńe joq", - dedi Narymbetov.
Ol filialda bári tynysh, nurotandyqtar Arys qalasynyń turǵyndarymen birge ekenin qadap aitty.
Nur Otan partiiasy týdy julyp alǵandardyń jaýapqa tartylyp-tartylmaitynyn quqyq qorǵaý organdary sheshetinin málimdedi.
"Ony jaýapty quqyq qorǵaý organdary ózi sheshsin. Bul partiianyń jumysy emes. Eger zań buzylsa, olar bul jumyspen ózderi ainalysady. Týdy julýǵa qatysty eshqandai is qozǵalǵan joq, biz ol jaily estimedik", - dedi partiianyń baspasóz qyzmetiniń jetekshisi Maksim Spotkai.
