Nur Otan partiiasynyń hatshysy Arys turǵyndarynyń mazasyn qashyrǵan saýalǵa jaýap berdi, dep habarlaidy Sputnik Qazaqstan.
Ortalyq kommýnikatsiialar qyzmetinde ótken brifingte jýrnalist partiia ókiline Arys halqynyń qalaǵa barǵysy kelmei otyrǵanyn aityp, osy rette Nur Otan partiiasy tarapynan qandai kómek kórsetiletinin surady.
"Turǵyndar biliktiń "qiraǵan úilerdi jóndeimiz, barlyǵyn qalpyna keltiremiz" degen sózine qaramastan, Arys qalasyna qaitadan barǵysy kelmeidi. Shymkent, Túrkistan qalalarynan úi surap otyr. Osyǵan qatysty pikirińizdi bildirseńiz. Nur Otan partiiasy kómektese ala ma?", - dedi BAQ ókili.
Suraqqa Nur Otan partiiasynyń hatshysy Tamara Dúisenova jaýap berdi.
"Azamattarǵa úi men qarajat berý, basqa qalalarǵa kóshirý máselesi qaralyp jatyr. Osy apattan zardap shekken azamattarǵa 4 jaqtan kómek berilýde. Birinshiden, prezident úkimetke rezervten qarjy bólý jóninde tapsyrma berdi. Respýblikalyq biýdjetten bólinetin qarjy Arys qalasyn jáne azamattardyń úilerin qalpyna keltirýge jumsalady. Sondai-aq úkimet pen oblystyq shtab kelise otyryp, basqa da maqsattarǵa qosymsha qarajat bólýi múmkin", - dedi ol.
Onyń aitýynsha, ekinshiden, apattan zardap shekken, densaýlyǵy nashar, múmkindigi shekteýli azamattarǵa kómek kórsetiledi.
"Keshe qorǵanys ministrligi apattan 3 adamnyń qaitys bolǵanyn aitty. Oqiǵa kezinde asyraýshysynan aiyrylǵan otbasylar nemese osy apatqa bailanysty jumyssyz qalǵan azamattar bolsa, onda memlekettik biýdjetten respýblikalyq saqtandyrý qorynan qarjy tólenedi", - dedi Tamara Dúisenova.
Nur Otan partiiasynyń hatshysy úshinshiden, árbir jergilikti biýdjetten qosymsha aqsha bólinýi múmkin ekenin aitty.
"Oblystyq, aýdandyq biýdjetten azamattardyń qajettiligine qarai jergilikti máslihattyń sheshimimen taǵy da qosymsha qarajattar bólinýi múmkin. Tórtinshiden, jarty milliard teńgege jýyq qarjy Túrkistandaǵy áleýmettik damý qoryna tústi. Osy qarajat ta bólinedi. Oblys ákiminiń shtabymen tyǵyz jumys istep jatyrmyz. Onda arnaýly komissiia bar. Ol birinshiden, qalany qalpyna keltirý, ony tazalaý máselesimen tolyq shuǵyldanady", - dedi ol.
Brifing barysynda Tamara Dúisenova Túrkistan oblysynyń ákimi Ómirzaq Shókeev turǵyndardyń osy aptanyń sońyna taman Arys qalasyna qaitýǵa múmkindigi bar degen sózin mysalǵa keltirip, adamdardy sabyrǵa shaqyrdy.
"Sondyqtan tiisti qarajatty bólý, azamattarǵa kómek kórsetý arnaýly komissiianyń quzyretinde. Men arnaýly komissiia arystyqtarǵa tolyq aqparatty jetkizedi dep oilaimyn. Qorǵanys ministrligi qalany tolyq tazalap boldyq deidi. Sondyqtan úkimet, qorǵanys ministrligi Arys qalasyndaǵy qaýipsizdiktiń saqtalýy jóninde tiisti habarlamany berip otyr", - dep túiindedi sózin Nur Otan partiiasynyń hatshysy.
