«Nur Otan» ár óńir, qala jáne aýdan boiynsha 216 sailaýaldy baǵdarlamasynyń jobalaryn jariialaýdy jalǵastyrýda. Búgin bileýshi partiiada aldaǵy 5 jylda Qaraǵandy jáne Shyǵys Qazaqstan oblystarynyń turǵyndaryn qandai ózgerister kútip turǵany aityldy, dep habarlaidy "Ult aqparat" atalmysh saiasi uiymnyń baspasóz qyzmetine silteme jasap.
Sonymen, partiianyń Shyǵys Qazaqstan oblysy boiynsha sailaýaldy baǵdarlamasynyń jobasynda 2025 jylǵa deiin óńirde shamamen 130 myń jumys ornyn qurý jáne ortasha jalaqyny 202 myń teńgege deiin arttyrý mindeti qoiylǵan. Bul rette «Nur Otan» eńbek naryǵynyń qajettilikterin eskere otyryp, 1,5 myń adamdy jyl saiyn qaita daiarlaýǵa yqpal etýdi josparlap otyr.
Sharýalarǵa barynsha qoldaý kórsetý úshin partiia jyl saiyn 50-ge jýyq túrli investitsiialyq jobalardy júzege asyrýdy usynady. Bul – sút-taýarlarynyń fermalaryn salý, bordaqylaý alańdaryn qurý, aýyl sharýashylyǵy taýar óndirýshilerin jeńildetilgen nesiemen qamtamasyz etý jáne t.b.
Óńirdiń týristik áleýetin iske asyrý maqsatynda Alakól kóliniń jaǵalaýyn damytý, Úrjar aýylyndaǵy áýejaidy qaita jańartý jáne Buqtyrma sý qoimasy arqyly ótetin kópir salý kózdelip otyr.
Avtojoldardyń sapasyn kezeń-kezeńmen jaqsartý úshin aldaǵy 5 jylda barlyq aýdandarda 2,5 myń shaqyrym joldy jáne 76 aýyldaǵy kóshelerdi jóndeý josparlanýda.
2025 jylǵa deiin partiia alǵashqy meditsinalyq-sanitarlyq kómek kórsetetin meditsinalyq uiymdardyń 15 minýttyq jerde ornalasýyn qamtamasyz etý mindetin qoiady. Bul rette partiia Semei qalasynda Iadrolyq meditsina ortalyǵyn, Gematologiia ortalyǵyn jáne Óskemen qalasynda 300 tósektik kóp beiindi aýrýhanany, sondai-aq Úrjar, Kúrshim, Tarbaǵatai aýdandarynda dárigerlik ambýlatoriialar salýǵa járdemdesetin bolady.
Partiia óziniń sailaýaldy baǵdarlamasy aiasynda barlyq muqtaj balalardy 100% qamti otyryp, inkliýzivti bilim berý úshin jaǵdai jasaýǵa qol jetkizbek. Balalar men jastar arasynda buqaralyq sportty damytý úshin partiia ártúrli eldi mekenderde 11 dene shynyqtyrý jáne saýyqtyrý keshenderin, 2 bassein, shaǵyn sport alańdaryn, stritvorkaýtqa arnalǵan alańdardy jáne hokkei korttaryn salý esebinen sporttyq infraqurylymdy keńeitýdi qolǵa alady.
Indýstriialyq sektordyń lokomotivi bolyp tabylatyn Qaraǵandy oblysynda «Nur Otan» jyl saiyn keminde 30 myń jańa jumys ornyn ashý mindetin qoiyp otyr. Sailaýaldy baǵdarlamanyń jobasy ónerkásipti, qurylys salasyn, aýyl sharýashylyǵyn, áleýmettik infraqurylymdy jáne t. b. odan ári damytýǵa baǵyttalǵan.
Óńirde qorshaǵan ortaǵa úlken aýyrtpalyq baiqalatyndyqtan, partiia aýaǵa lastaýshy zattardyń emissiiasyn 560 myń tonnaǵa deiin tómendetýdi qamtamasyz etý jáne qatty turmystyq qaldyqtardy qaita óńdeý úlesin 2025 jylǵa qarai 27%-ǵa deiin ulǵaitýdy maqsat etip otyr.
Ol úshin aldaǵy bes jylda «Qazaqmys» jáne «Arselor Mittal» kásiporyndaryndaǵy shań jáne gaz ustaý jabdyqtaryn jańartyp, «Saryarqa» magistraldyq gaz qubyryna qosylý qajet. Keńgir kentinde bioelektr stantsiiasyn, Jańaarqa aýdanynda qoqys suryptaý keshenin, Qaraǵandy qalasynda qoqys jaǵatyn jáne qoqys óńdeitin zaýyttar salý josparlanýda. Memlekettik orman qory aýmaǵynda da, ónerkásip kásiporyndarynda da jasyl aimaqtardyń aýqymy ulǵaitylatyn bolady.
Sonymen qatar, partiia Qaraǵandy, Balqash, Qarajal, Temirtaý, Saran jáne Jańaarqa aýdanynda sý qubyry jelilerin salý men qaita jańartýǵa qol jetkizetin bolady. Búginde olardyń tozýy 85%-dy quraidy. 250 kóppáterli turǵyn úi men 50 nysandy ortalyqtandyrylǵan jylý júiesine qosý úshin ortalyq qazandyqtyń qurylysyn aiaqtaýdy qamtamasyz etý kózdelýde. «Nur Otan» 180 aýylda sýmen jabdyqtaý nysandaryn salý jáne qaita jóndeýden ótkizýdi qolǵa almaq.
Sondai-aq, 2025 jylǵa qarai 30 myń páterge jýyq turǵyn úi salý josparlanýda.
Bilim berý salasynda partiia músheleri oblystyń 100 myńǵa jýyq oqýshysyna tegin ystyq tamaq berýdi uiymdastyrýdy, Qaraǵandy jáne Qarqaraly qalalarynda 4 stýdenttik jataqhananyń qurylysyn, sondai-aq Jezqazǵan qalasynda jańa balabaqshalardyń ashylýyn qamtamasyz etpek. Bul óz kezeginde 2025 jylǵa qarai 1 jastan 6 jasqa deiingi balalardy balabaqshamen qamtýdy 100%-ǵa deiin arttyrýǵa múmkindik beredi.
Óńirlerdiń sailaýaldy baǵdarlamalarynyń jobalarymen tolyǵyraq primaries.kz saitynan tanysýǵa bolady.
Baspasóz qyzmeti taratqan aqparatqa sáikes, bul baǵdarlamalar túpkilikti emes, ol kraýdsorsing qaǵidaty boiynsha halyqtyń pikirin eskere otyryp pysyqtalmaq.
.jpeg)