«Nur Otan» partiiasy janyndaǵy Azamattyq qoǵamdy jáne memlekettik basqarýdy damytý jónindegi respýblikalyq qoǵamdyq keńestiń kezekti otyrysynda jaýapty azamattyq qoǵamdy damytý baǵytyndaǵy atqarylǵan jumystar jáne jaqynda ótken aýyl ákimderi sailaýynyń aralyq qorytyndysy talqylandy, dep habarlaidy "Ult aqparat".
Partiianyń Jol kartasynda el damýynyń ózekti mindetteri men máselelerin sheshý úshin biyl respýblika boiynsha 1700 azamattyq belsendi tartý kózdelgen. Olardyń quramynda ár óńirdegi bedeldi saiasatkerler, sarapshylar, BAQ, ÚEU t.b. sala ókilderi bar.
Aqparat jáne qoǵamdyq damý vitse-ministri Bolat Tlepovtiń aitýynsha, barlyq óńirde jergilikti atqarýshy organdar azamattyq belsendilerdiń derekter bazasyn jasaqtaǵan. Bul rette ol Qoǵamdyq keńesterdiń 2015 jyly Elbasynyń «5 institýtsionaldyq reformasy» aiasynda qurylǵannan beri qoǵam men biliktiń arasyn jalǵaýshy retinde óziniń tiimdiligin kórsetkenin atap ótti. Qazir elimiz boiynsha 249 Qoǵamdyq keńes jumys istese, olar barlyq ortalyq memlekettik organdarda, oblys, qala men aýdan ákimdikterinde qurylǵan.
«Osy 5 jylda 20 myńnan astam normativtik qujat qoǵamdyq keńesterdiń saraptamasynan ótken bolsa, sonyń árbir onynshysy keiin qaitaryldy. Iaǵni, azamattardyń múddesine tikelei áser etetin bul qujattardyń kemshiligi der kezinde anyqtaldy. Jyl saiyn 1500-den asa túrli memlekettik organnyń basshylary qoǵamdyq keńester aldynda esep beredi. Sondai-aq, qoǵamdyq keńester júrgizetin monitoring memlekettik qyzmetter sapasynyń artýyna oń áser etýde. Monitoring aiasynda áleýmettik mańyzdy taqyryptar boiynsha 1000-nan astam zertteý júrgizildi», - dedi ol.
Óz kezeginde «Atameken» UKP Basqarma tóraǵasy Abylai Myrzahmetov qoǵamdyq keńester quramynyń sapasyna nazar aýdardy.
«Qoǵamdyq keńestiń músheleri – oiyn ashyq aitatyn belsendi, tanymal azamattar. Biraq, olardyń barlyǵy birdei memlekettik satyp alý, aýdit júrgizý siiaqty salalardyń tetikterin bile bermeidi. Sondyqtan olarǵa, ásirese, kvazimemlekettik sektordaǵy qoǵamdyq keńesterdiń quramyna kiretin azamattarǵa arnaiy seminarlar ótkizip, biýdjet, aýdit, qarjy salalaryn oqytqan jón bolady. Sonda qoǵamdyq keńesterdiń áleýeti artyp, quzyreti keńeiedi», - degen A.Myrzahmetov bul iske «Atameken» UKP atsalysýǵa daiyn ekenin jetkizdi.
Keńes tóraǵasy Aidos Sarym bul baǵyttaǵy «Nur Otan» partiiasy janynan qurylǵan 14 respýblikalyq jáne 1,7 myń aimaqtyq qoǵamdyq keńes jumysyn atap ótti. Búginge deiin ótkizilgen respýblikalyq keńestiń 50-ge jýyq otyrysynda 80-nen astam másele qaralyp, memlekettik organdarǵa 650-den asa usynym joldandy. Al, aimaqtyq keńesterde 5 myńnan asa otyrys ótip, onda 9,3 myń másele qaralǵan. Nátijesinde, 15 myń usynys memlekettik organdarǵa joldandy.
Sondai-aq, Azamattyq qoǵamdy jáne memlekettik basqarýdy damytý jónindegi respýblikalyq qoǵamdyq keńestiń alańynda aýyl ákimderiniń tikelei sailaýynyń aralyq qorytyndysy talqylandy. Ulttyq ekonomika vitse-ministri Álisher Ábdiqadyrovtyń aitýynsha, sailaýǵa 2403 kandidat (bir orynǵa úsh úmitkerden) qatysyp, 784 ákim sailanǵan. Kandidattardyń 60%-y ózin-ózi usynsa, 40%-y saiasi partiialardyń atynan túsken. Sailanǵan ákimderdiń teń jartysy – buryn bul qyzmette bolmaǵan jańa tulǵalar.
Aýyl ákimderiniń sailaýyna qatysty belgili saiasattanýshy Rasýl Jumaly óz oiyn ortaǵa saldy.
«Jazda sailaý naýqany belsendi ótti. Ásirese, «Nur Otan»-nyń basqa saiasi partiialarmen salystyrǵanda keshendi jumys atqarǵanyn atap ótý kerek. Aýyl ákimderin sailaý jalǵasyp jatqanda óńirlerdiń qarqyndy báseńdetpegeni jáne naýqanǵa, úmitkerlerge qatysty barlyq aqparatty búge-shúgesine deiin naqty, ýaqtyly alyp otyratyn tiisti tetikterdi qarastyrǵan jón», - dedi Keńes múshesi, belgili saiasattanýshy Rasýl Jumaly.
