«Nur Otan» partiiasy sý tasqynynan zardap shekken Maqtaral aýdanyna 400 tonnadan astam gýmanitarlyq kómek jibergen.
Al «Jas Otan» volonterleri men belsendileri jergilikti jerde jetkizilgen kómekti turǵyndarǵa úlestirip berýmen ainalysyp jatyr. Bul týraly Nur Otan partiiasy Tóraǵasynyń birinshi orynbasary Baýyrjan Baibek Instagram paraqshasynda paraqshasynda jazdy, dep habarlaidy "Ult aqparat".
«Qurmetti dostar! Ózderińiz biletindei, el Prezidenti Qasym-Jomart Toqaevtyń tapsyrmasy boiynsha sý tasqynynan zardap shekken Túrkistan oblysy Maqtaral aýdanynyń turǵyndary tolyǵymen jańa jáne jóndelgen baspanaǵa ie bolady. Árbir turǵyn respýblikalyq biýdjet esebinen 100 myń teńge alady. Elbasynyń tapsyrmasymen Memleket basshysy bastaǵan áleýmettik qoldaý sharalaryna qosymsha retinde «Nur Otan» maqtaraldyqtarǵa 400 tonna gýmanitarlyq kómek jiberdi. Kómektiń ishinde jeke tazalyq quraldary, kiim-keshek, tósek oryn men basqa da kerek-jaraqtar bar», - dep jazdy Baýyrjan Baibek.
Onyń habarlaýynsha, «Jas Otan» jastar qanatynyń volonterleri men belsendileri halyqqa kómekti taratyp berý jumysymen ainalysyp jatyr.
«Kómekti ýaqtyly uiymdastyrýǵa atsalysqan partiialastar men belsendilerge alǵys aitqym keledi. Ásirese bizdiń partiianyń jastar qanatynyń jumysyn erekshe atap ótýge bolady. Birlik, yntymaq jáne ózara kómek qolyn sozý sekildi qasietter tap osyndai qiyn-qystaý sátterde kórinedi» - dep jazdy Baýyrjan Baibek.
Sondai-aq, ol Nursultan Nazarbaevtyń bastamasy boiynsha «Nur Otan» partiiasy men «Birgemiz» qory qazaqstandyqtarǵa ataýly kómek kórsetýdi jalǵastyryp jatqanyn tilge tiek etti.
«Búgingi kúnge deiin 150 myńnan astam otbasy azyq-túlik sebeti men antiseptikalyq qural aldy. Buǵan qosa 100 myń otbasy tegin maskamen qamtamasyz etildi. 360 myń otbasy 50 myń teńgeden bir jolǵy tólemmen qamtyldy. Otbasy múshelerin qosa eseptegende, bul shamamen 1 mln qazaqstandyqty quraidy» - dedi partiia Tóraǵasynyń birinshi oranbasary.
