Elbasy Nursultan Nazarbaev Úkimettiń arnaiy otyrysyn ótkizý qajettigin málimdedi, dep habarlaidy "Ult aqparat".
"Men aldaǵy ailarda Úkimettiń arnaiy otyrysyn ótkizýdi usynamyn. Oǵan májilistegi "Nur Otan" partiiasynyń fraktsiiasy qatysýy qajet. Sol jerde qalǵan máselelerdi talqylaýǵa bolady. Asqar Uzaqbaiuly (Asqar Mamin - Úkimet basshysy), odan Úkimet utady. Sol kezde jumystyń nátijesin ashyq jariialap, sheshilmegen máselelerge basymdyq berý kerek", - dedi Nazarabaev "Nur Otan" partiiasy saiasi keńesiniń keńeitilgen otyrysynda.
Onyń aitýynsha, Májiliste Úkimet men fraktsiia birlesip jumys isteýi kerek. Sebebi ekeýi de bir maqsatty kózdeidi. Ol – halyqtyń ál-aýqaty.
"Bólip isteitin eshteńe joq. Barlyǵymyzdyń isteitinimiz bir sharýa. Bizdiń barlyq sheshimderimiz halyqtyń múddesi úshin qabyldanady. Demek, sonyń bárin birlesip sheshýimiz kerek. Jalpy, partiianyń sailaýaldy baǵdarlamasy men prezidenttiń bergen barlyq ýádelerin oryndaýdy qatań baqylaýǵa alǵan jón. Halyq partiianyń jumysyn sezýi kerek", - dep atap kórsetti Nazarbaev.
Aita keteiik, elordada Qazaqstannyń tuńǵysh prezidenti Nursultan Nazarbaev pen prezident Qasym-Jomart Toqaevtyń qatysýmen Nur Otan partiiasy saiasi keńesiniń keńeitilgen otyrysy ótip jatyr.
Jiyn barysynda partiianyń sailaýaldy baǵdarlamasy men partiiany qaita júkteýdiń negizgi baǵyttary talqylanýda. Budan bólek, saiasi keńes biýrosyna jańa músheler qabyldaý josparlanyp otyr.
