Bul týraly búgin «Nur Otan» partiiasynyń janynan qurylǵan Balalar quqyǵyn qorǵaý jónindegi respýblikalyq keńestiń alǵashqy otyrysynda belgili boldy.
Partiia Tóraǵasy Birinshi orynbasarynyń aitýynsha, Keńestiń basty maqsaty – balalardyń quqyǵy men múddesin jan-jaqty qorǵap, olardyń qajettilikterin qamtamasyz etý.
– Keńes Elbasynyń tikelei tapsyrmasymen qurylyp otyr. Jalpy bul másele birazdan beri kóterilip, osyǵan deiin daiyndyq jumystary júrgizilip kelgenin atap ótken jón. Aldaǵy ýaqytta osy baǵytta naqty usynystar daiyndap, Úkimetpen, jergilikti atqarýshy organdarmen jáne úkimettik emes uiymdarmen birlesip jumys isteimiz – degen Máýlen Áshimbaev bul iske partiianyń barlyq áleýeti jumyldyrylatynyn jetkizdi.
Sonymen qatar ol Keńestiń qyzmet aiasyn keńeitý máselesine de nazar aýdaryp, balalar quqyǵyn qorǵaýmen birge, kóp balaly otbasylarǵa qoldaý kórsetý, jumys isteitin kóp balaly analarǵa laiyqty jaǵdai jasaý siiaqty ózekti máselelerdi de qamtýdyń mańyzy zor ekenin tilge tiek etti. Sondyqtan osy baǵyttarda da tiimdi usynystar daiyndalmaq.
Keńes quramyna Parlament Májilisiniń depýtattary, memlekettik organdar men úkimettik emes uiym ókilderi, salalyq sarapshylar jáne qoǵam qairatkerleri múshe boldy. Keńes músheleriniń sheshimimen onyń tóraǵalyǵyna «Nur Otan» partiiasy Tóraǵasynyń birinshi orynbasary Máýlen Áshimbaev sailandy. Al tóraǵa orynbasary bolyp «Qasietti jol» qaiyrymdylyq qorynyń negizin qalaýshy, Astana qalasyndaǵy balalar úiiniń direktory Dinara Zakieva sailandy.
Óz sózinde D.Zakieva qazirgi tańda balalar quqyǵyn qorǵaý jumystary kóbine saldarmen kúres sipatynda júrgizilip kele jatqanyn aitty.
– Biz kóbine keleńsizdikterdiń saldarymen kúresip kelemiz. Sondyqtan Keńestiń jumysynda eń aldymen aldyn alý sharalaryna basymdyq berip, aldymyzǵa osy baǵytta keshendi is júrgizýdi mindet etip qoiyp otyrmyz. Osy rette jańadan qurylyp otyrǵan Keńestiń turaqty túrde kúndelikti jumys isteitin organ bolatynyn erekshe atap ótkim keledi, – deidi D.Zakieva.
Jiyn barysynda «Taiburyl» qoǵamdyq qory qamqorshylar keńesiniń tóraǵasy Murat Ábenov, «Ár bala otbasymen birge bolýy kerek» qoǵamdyq qozǵalysynyń jetekshisi Sholpan Baibolova, «Best for Kids» qoǵamdyq qorynyń vitse-prezidenti Emin Askerov, IýNISEF-tiń balalar quqyǵyn qorǵaý jónindegi baǵdarlamasynyń úilestirýshisi Tatiana Aderhina jáne basqa da jiynǵa qatysýshylar sóz alyp, balalar quqyǵyn qorǵaý máselesine qatysty óz usynystaryn jetkizdi.
Jiyndy qorytyndylaǵan «Nur Otan» partiiasy Tóraǵasynyń Birinshi orynbasary Máýlen Áshimbaev elimizdiń jarqyn bolashaǵy úshin bul istiń mańyzy zor ekenin aityp, barlyq múddeli taraptardy birlesip jumys isteýge shaqyrdy.
