Qazaqstandyq diplomat, elorda áýejaiyndaǵy NQZ kodynyń avtory Altai Abibýllaev jańa kodtyń mán-maǵynasyn túsindirdi, dep habarlaidy QazAqparat.
«Barshańyzdy Qazaqstannyń basty áýejaiynyń jańa kodymen quttyqtaimyn. Kóptegen ideialardyń arasynan tiisti quziretti memlekettik organ men usynǵan jańa kodty iske asyryp, halyqaralyq deńgeide kelissóz júrgizip, NQZ kodyn bekitkenine óte qýanyshtymyn», - dedi diplomat áýejaidaǵy saltanatty tanystyrylymda.
Onyń aitýynsha, NQZ kodynyń logikalyq jáne ideologiialyq mańyzy zor.
«N - Nur-Sultan qalasy jáne N. Nazarbaev áýejaiyn bildiredi. Al QZ - jańa egemendi Qazaqstannyń jańa álipbidegi Qazaqstan ataýyn bildiredi. Iaǵni, jańa kodtyń úsh maǵynasy bar - jańa áýejai, jańa elorda jáne jalpy qazaq eliniń halyqaralyq sahnadaǵy jańa álipbii. Áýejai kodyn aýystyrý - 50 jyldaǵy úlken jetistik, Aviatsiia komitetiniń halyqaralyq sahnadaǵy jetistigi. Barsha qazaq elin, búkil jolaýshylardy quttyqtaimyn. Laiym osy ataý máńgilikke berilsin. Osy kod arqyly elimizdiń aty halyqaralyq deńgeide jańa serpilis alyp, brend retinde nyǵaisyn», - dedi A. Abibýllaev.
Aita keteiik, Nur-Sultan áýejaiynyń úsh áriptik kodyn ózgertý jumystary 2014 jyldan beri júrgizilgen. Búkil álem boiynsha áýejailarǵa bir ret jáne turaqty negizde kod berý jónindegi IATA qaǵidalaryna qaramastan, qazaqstandyq tarap óz maqsatyna qol jetkizdi.
Bul ózgerister 2019 jyldyń 14 qazanynda Varshava qalasynda (Polsha) IATA-nyń barlyq músheleriniń qatysýymen Jolaýshylar tasymaly standarttary (Passenger Standards Meeting) kezdesýinde qoldaý tapty.
8 maýsymnan bastap barlyq brondaý júielerinde, otyrǵyzý talondarynda, bagaj birkalarynda jáne aqparattyq tabloda jańa NQZ kody kórsetiledi.
