Notrdamda bolmaǵanyń, kórmegeniń úshin ózińdi varvar sanap qalady ekensiń myna halyqtyń kúńirenip, teńselip ketkeninen...
Qansha ǵasyrlyq ýaqyttyń tezine, soǵysqa tótep bergen sáýlet ónerin, tarih kýágerin, tutas bir órkeniet jádigerin órt jalmaǵany, árine, ókinishti...
Biraq meni ózimizdiń tarihi jerlerimizdiń qaraýsyz jatqany, Notrdamǵa joqtaý aityp otyrǵan qazaqtardyń óz elimizdegi keseneler men qorǵandarǵa nemquraily qaraityndyǵy kóbirek qinaidy.
Mysaly, Saraishyqqa barǵan saiyn kóńilim lailanyp qaitady. Ózimizdiń tarihty kóz aldymyzda Jaiyq shaiyp, bas súiekter shashylyp jatyr. Adamdar jerin qazyp, eskiniń tiyn-tebenin izdep shurq-tesik qylǵan.
Notrdam de Pari otqa orandy, adam qýanatyn jaǵdai emes. Biraq, bailary mursatta 100 milliondaǵan eýrodan bólisip, oǵan bizdiń qazaqtar da qosylyp tiyn-teben aýdaryp (shynymen) ony qalpyna keltirýge qazirden kirisip ketti.
Al seniń, seniń ata-babańnyń, seniń ultyńnyń tarihy bizdiń bezbúirektigimizden eleýsiz de qaraýsyz sol jatqan kúii jatyr...
Arada jyldar ótedi. Ul-qyzymyzdy qaitadan qalpyna keltirgen Notrdamǵa aparyp, 2019 jyldyń sáýirinde tarihi oqiǵaǵa Feisbýktyń tikelei efiri arqyly kýáger bolǵanyńdy, onyń otqa oranǵan munarasy qalai qulap bara jatqanyn óz kózińmen kórgenińdi, tipti sol sátte ony skrinshot jasap úlgergenińdi aityp, qazirgi restavratsiiasy originalynan bir mysqal da kem bop shyqpaǵanyn, ony qalpyna keltirý úshin sen de aqsha aýdarǵanyńdy jyr qylyp jetkizesiń. Sol kezde balań senen "Áke, bizdiń osyndai tarihi jádigerlerimiz bar ma? Qalai, qaidan kórsem bolady?" dep suraidy... Jaýap bere alsaq sol kezde...
P.S. Damyp ketken álem qashan da damyǵandyǵyn kórsetedi ǵoi, biz sekildi artta qalǵan elderge úlgi bop. Máselen, Parijdegi osy bir "Qudai Ana" kafedral shirkeýin sol qalpynda restavratsiia jasaý úshin onyń modelin, áý bastaǵy úlgisin qaidan alǵaly jatqanyn bilesizder me? Iá, bilesizder, estidińizder. Assassin's creed degen oiynnan. Iá, iá, kádimgi kompiýterlik videoiynnan. Sóitse, ol oiynda osy shirkeýdiń barlyq qyrlary men ushtary, keskini men kelbeti týra jasalǵan eken...
Timýr Bekturdyń feisbýktaǵy jazbasynan
