Resei prezidenti Krasnoiar ólkesinde munai ónimderiniń tógilýine bailanysty federaldyq deńgeide tótenshe jaǵdai jariialaý týraly usynysty maquldady.
29 mamyrda Norilsk-Taimyr energetikalyq kompaniiasyna tiesili qoimalardyń birinde sańylaý paida bolyp, 20 myń tonna munai ónimi tógilip, 350 sharshy metr jerge jaiylǵan. Munai ónimderi topyraq, sý jáne jolǵa da tógilgen.
Tótenshe jaǵdai ministri Evgenii Zinichev Norilskide tótenshe jaǵdai jariialaý týraly usynys aitqan. Onyń sózine qaraǵanda ministrlikke munaidyń tógilgeni týraly aqparat eki kún keshigip jetken. Vladimir Pýtin oǵan aqparattyń ýaqytynda jetpeý máselesin quqyq qorǵaý organdary zertteýi tiis dep aitqan. "Kommersant" basylymynyń jazýynsha, prezident biliktiń Norilskidegi jaǵdaidy áleýmettik jeliden bilgenine nazalanǵan.
Buǵan deiin Pýtin qatysqan otyrysta tabiǵi resýrstar jáne ekologiia ministri Dmitrii Kobylkin tótenshe jaǵdai ministrliginiń mamandarynsyz, tipti áskerilerdiń kómeginsiz apattyń saldarymen kúresýge shamasy jetpeitinin aitqan. Onyń aitýynsha, aimaq biligi jinalǵan otyndy órteýdi usynǵan.
"Jaǵdai óte kúrdeli. Arktika aimaǵynda osynsha kólemdegi otyndy qalai jaǵýǵa bolady, elestetýdiń ózi qiyn" dedi ministr.
Tótenshe jaǵdaiǵa bailanysty 3 qylmystyq is qozǵalǵan. Apat bolǵan TETs-3 tsehynyń bastyǵy ustalǵan.
Greenpeace ekologtary Norilsktegi oqiǵany Arktika sheńberindegi iri apat dep baǵalaidy. Osyǵan uqsas jaǵdai Aliaska jaǵalaýynda 30 jyl buryn bolǵan. Krasnoiar ólkesinde tirkelgen "Plotina" ekologiialyq uiymynyń jetekshisi Aleksandr Kolotov Norilsktegi apat jyldar boiy ózen balyqtaryna jáne sol mańdaǵy tirshilik ielerine qaýip tóndiredi degen.
