AQSh-taǵy álem chempionatynda qazaqstandyq jeńilatlet Nora Djerýto kedergiler arqyly 3000 metrge júgirýden rekord ornatyp, jeńiske jetti, - dep habarlaidy Tengrinews.kz agenttigi Vesti.kz saityna silteme jasap.
Djerýto 8:53.02-de márege jetti. Chempion federatsiianyń baspasóz qyzmetine aldaǵy josparlary týraly aityp berdi.
"Álem chempionatynda jeńiske jetkenime óte qatty qýanamyn ári baqyttymyn! Jańa Otanymnyń týy astynda óner kórsetý múmkindigin kúttim. Búgin men álem chempionatynda Qazaqstanǵa erekshe syilyq jasap, ózimdi kórsetkim keldi. Qolymnan keldi dep oilaimyn", - dedi Djerýto.
Qazaqstandyq bul qashyqtyqta tarihtaǵy úshinshi nátijeni kórsetip, álem chempionatynda rekord ornatty. Ol mundai nátijege kóp eńbek pen uzaq daiyndyqtyń arqasynda jetkenin aitty.
"Bul ómirimdegi eń mańyzdy kúnderdiń biri boldy. Men búkil komandanyń senimi men úmitin aqtadym. Birinshiden, otbasyma jáne Qazaqstanǵa senim bildirgeni úshin erekshe alǵysymdy bildiremin. Qazaqstandyq tarap aitarlyqtai qoldaý kórsetip, sońǵy bes jylda kedergilerden ótýdiń tehnikasy men ádistemesin úiretti. Bul osy qashyqtyqqa daiyndyqtyń mańyzdy kezeńderiniń biri. Búgingi nátije – meniń ǵana emes, búkil Qazaqstannyń jeńisi. Men Qazaqstandaǵy jeńil atletikanyń odan ári damýy úshin bar bilimimdi, tájiribem men kúsh-jigerimdi jumsaýǵa daiynmyn", - dep bólisti ol.
Endi chempion "Gaýhar ligasynyń" eń bedeldi kezeńine daiyndalyp jatyr. Boijetken ol jaqta da medal alýdan úmitti.
"Ókinishke qarai, Aziia oiyndary ótpei qaldy, onda men de elimizdiń týyn kóterýdi josparlaǵan edim. Soǵan qaramastan, meni alda talai jańa bastamalar kútip tur. Deńgeidi túsirmeý úshin barymdy salamyn", - dep bólisti Nora Djerýto.
Eske salaiyq, Keniianyń týmasy Djerýto Qazaqstanǵa 2017 jyly kóship kelgen. 2022 jyly ol álem chempionatynda Qazaqstan atynan shyǵýǵa resmi ruqsat aldy.
