Atyraý oblysy ákimi Inder aýdanyna issapar barysynda birqatar nysandardy aralady, dep xabarlaidy Atyraý oblysynyń Óńirlik kommýnikatsiialar qyzmeti.
Aimaq basshysy aldymen Inderbor kentindegi 60 páterlik turǵyn úige bardy. NKOK kompaniiasynyń demeýshiligi esebinen salynǵan nysan 2017 jyldyń jeltoqsan aiynda paidalanýǵa berildi.
Odan keiin Nurlan Noǵaev «Inder aýdandyq bilim bóliminiń oqýshylar shyǵarmashylyq ortalyǵy" KMM-men tanysty. 2014 jyldan bastap oqýshylar shyǵarmashylyǵy bolyp jumysyn bastaǵan mekemede búginde 19 muǵalim jumys jasap, 19 úiirme boiynsha 683 oqýshy oqidy.
Sondai-aq, sapar barysynda aimaq basshysy Esbol aýylyndaǵy qurylysy júrip jatqan 300 oryndyq mádeniet úiimen tanysty. Qazirgi kezde ǵimarat qurylysy aiaqtalǵanmen qurylys kezinde ketken kemshilikterdi joiý jumystary júrgizilýde.
Sonymen qatar, oblys basshysy Esbol aýylyndaǵy mal molasyna bardy. 2017 jyly jeltoqsan aiynda qurylysy aiaqtalǵan jańa tiptik úlgidegi mal molasy tiisti zańdylyqqa sai eldi mekennen 1700 m qashyqtyqta ornalasqan. Syrty qorshalǵan. Arnaiy adamdar kiretin esigi, avtokóliker kiretin qaqpasy bar.
Nysanmen tanysqan aimaq basshysy oblystyń barlyq aýdandarynda atalǵan nysannyń bolýy kerektigin eskertti:
-Bul másele áli de ózekti. Barlyq aýdandarda bul nysan bolýy kerek. Aýdandardyń mal molalarymen tolyq qamtylýyn qatań tapsyramyn - dedi oblys ákimi.
Esbol aýylynan keiin oblys ákimi Kóktoǵai aýylyndaǵy dárigerlik ambýlatoriiasynda boldy.
1 dáriger, 14 orta býyn qyzmetkerleri búginde 6752 adamdy qabyldai alady. Oblys ákimi nysanmen tanysa júrip qajet bolsa aýylǵa mamandar shaqyryp, barlyq jaǵdai jasaýdy tapsyrdy.
- Meditsina salasyna maman tapshy bolsa aldyrtaiyq. Jáne olar mindetti túrde baspanamen qamtamasyz etilýi kerek. Jergilikti bilik meditsina mamandaryna barlyq jaǵdaidy jasaýǵa daiyn,- dep atap ótti aimaq basshysy.
Sonymen qatar, memlekettik-jekeshelik áriptestik boiynsha salynǵan qyzmettik páterlerdi kórdi. Qazirgi tańda bul úide politsiia qyzmetkeri, sport jattyqtyrýshysy jáne memlekettik qyzmetshiler turady. Aita keteiik, Inder aýdany boiynsha búgingi tańda 2 páterlik 28 úi qajetti mamandarǵa paidalanýǵa berilgen.
Keiin, Kóktoǵai aýylyndaǵy apatty jaǵdaidaǵy internat, eski dárigerlik ambýlatoriia ǵimaratynyń jai-kúiin kórdi. Aldaǵy ýaqytta ǵimarattardy buzyp ornyna jańa ǵimarattardy salý josparlanýda.
Sondai-aq, aimaq basshysy "Qulynshaq" sharýa qojalyǵynda boldy. Sharýa qojalyqtyń jumysymen tanysyp asyl tuqymdy mal ósiretin sharýa qojalyqtyń qyzmetkerlerine aldaǵy jumystaryna sáttilik tiledi.
Atyraý oblysynyń ákimi Nurlan Noǵaev Inder aýdanyndaǵy issapar kezinde «Nur Otan» partiiasy Inder aýdandyq filialy ǵimaratynda qoǵamdyq qabyldaý ótkizip, artynda aýdan ardagerlerimen kezdesti.
