Atyraý oblysynyń ákimi Nurlan Noǵaev «Chevron» kompaniiasynyń basshylyǵymen 29 maýsym kúni «Teńiz» ken ornynda bolǵan turmystyq kikiljińdi talqylady. Bul týraly Atyraý oblysy ákiminiń baspasóz qyzmeti málimdedi, dep habarlaidy "Ult aqparat".
Búgin Atyraý oblysynyń ákimi Nurlan Noǵaev "Chevron" kompaniiasynyń Eýropa, Eýraziia, Taiaý Shyǵystaǵy barlaý men óndirý jónindegi prezidenti Todd Levimen kezdesti.
Nurlan Noǵaev qazir jaǵdai rettelgenin, Teńiz jobasyndaǵy jumysshylardyń ómirleri men densaýlyqtaryna qaýip joq ekenin aitty.
Todd Levi óz kezeginde "Chevron" kompaniiasynyń saiasaty boiynsha kompaniianyń barlyq qyzmetkerine teń dárejede qurmet kórsetiletinin, quqyqtary men mindetteri birdei ekenin atap ótti.
"Osyndai oqiǵanyń endi qaitalanbaýy úshin Teńiz jobasyna tartylǵan barlyq merdiger mekemeler arasynda túsindirý jumystaryn júrgizemiz. Jergilikti atqarýshy organdarǵa, quqyq qorǵaý organdaryna jaǵdaidy tez retteýge atsalysqandary úshin rizashylyq bildiremin. Aldaǵy ýaqytta da ózara bailanysymyzdy tabysty jalǵastyra beretinimizge senemiz",- dedi Todd Levi.
