Mańǵystaý oblysynyń ákimi Nurlan Noǵaev Jańaózen qalasynyń bir top belsendi azamatymen kezdesip, turǵyndardy tolǵandyrǵan áleýmettik máselelerdi talqylady, dep habarlaidy QazAqparat.
Oblys ákiminiń baspasóz qyzmetinen málim etkendei, turǵyndar qaladaǵy aýyzsý, jumyssyzdyq, azyq-túlik baǵasy jáne ózge de áleýmettik máselelerdi sheshýdi surady.
Jiyn barysynda oblys ákimi Memleket basshysy Qasym-Jomart Toqaevtyń tapsyrmasymen Úkimet 2025 jylǵa deiingi Mańǵystaý oblysynyń áleýmettik-ekonomikalyq damýynyń keshendi josparyn bekitkenin atap ótti.
«Bes jylǵa josparlanǵan joba aiasynda oblysqa 2,1 trln teńge tartylady. Keshendi jospar sheńberinde injenerlik jeliler, infraqurylym, aýyzsý óndiretin zaýyttar, zamanaýi mektepter men sport keshenderin salýǵa baǵyttalǵan barlyǵy 226 joba iske asady. Bul jumystar Jańaózen qalasynda da júzege asyrylatyn bolady, - dedi Nurlan Noǵaev.
Oblys ákiminiń aitýynsha Jańaózen qalasyndaǵy bilim men densaýlyq salasynda da tyń jobalar iske asyrylady dep kútilýde.
«Nur-Sultan qalasynan bilim salasynda jumys istep júrgen kásipkerler toby kelip, Jańaózen qalasyndaǵy 10 mektepti senimgerlikke alamyz degen usynys jasady. Olar qarajatyn ózderi quiady, ishindegi oqý-ádistemelik quraldaryn jańadan jasaqtap, aǵymdaǵy jóndeý jumystaryn júrgizedi. Jumys toby sondai-aq elimizdiń úzdik oqytýshylarynyń tájiribelerin alyp kelip, mektep basshylary men muǵalimderiniń biliktiligin arttyrmaqshy. 10 jyl boiy akademialyq jáne ádistemelik súiemeldeý júrgizip, memlekettik standart boiynsha bilim men tárbie alatyndai jaǵdai jasaimyz dedi.
Bizdiń maqsatymyz balalarymyzǵa sapaly bilim men tárbie berip, bolashaqtaryna senim uialatyp, munai salasynan basqa da jańa mamandyqtardy boilaryna sińirý. Munai erteli-kesh túgesiledi. Biz balalarymyzdyń ózge salalarda básekege qabiletti bolýyn qamtamasyz etýimiz qajet.
Sondai-aq, «Samuryq-Qyzyna», «QazMunaiGaz», «ÓzenMunaiGaz» kompaniialarynyń qarajatyna munaishylarǵa ǵana emes, barlyq turǵyndarǵa arnalǵan eń ozyq úlgidegi meditsinalyq ońaltý ortalyǵy (50 oryndyq) salynyp jatyr. Onda álemniń sońǵy úlgidegi meditsinalyq qondyrǵylary ornatylatyn bolady. Ortalyq osy jyldyń birinshi toqsanynda paidalanýǵa beriledi», - dedi oblys ákimi.
Jiyn sońynda aimaq basshysy aitylǵan ózekti máseleler nazarǵa alynyp, óńirdiń damý josparyna sáikes tiisti sheshimder qabyldanatynyn aitty.
