Beibitshilik boiynsha Nobel syilyǵynyń laýreaty, 2012 jyly qyzdardyń bilim alý quqyǵyn qorǵaǵany úshin pákistandyq tálipterdiń shabýylyna ushyraǵan Malala Iýsýfzai 9 qarashada Twitter jelisinde turmys qurǵanyn habarlady.
Ol Aser Málik esimdi jigitpen otbasyn qurǵan. Neke qurý rásimi Ulybritaniianyń Birmingem qalasynda Islam ǵurpy boiynsha ótken.
"Búgin ómirimdegi eń mańyzdy kún. Aser ekeýimiz nekelesip, ómirlik serik atandyq. Shaǵyn nekelesý rásimin Birmingemdegi úiimizde otbasymyzben birge atap óttik. Biz úshin duǵa etýlerińizdi suraimyn. Bolashaqqa birge qadam basýǵa asyqpyz" dep jazdy Malala Twitter'de.
Onyń jazbasyna 310 myń laik basylyp, 23 myń ret qaitalap basylǵan.
Malalanyń serigi Aser Malik Twitter'degi akkaýntynda Pákistan kriket keńesinde qyzmet isteitin biznes menedjer dep jazyp qoiǵan.
Malala 2012 jyly Pákistanda ózi oqyp júrgen mektep avtobýsyna jasalǵan shabýyl kezinde basyna oq tiip, jaralanǵan. Shabýyldy Malalanyń qyzdarǵa bilim berý kampaniiasyna qarsy tálipter jasaǵan. Malala shabýyldan aýyr jaralanǵan, biraq Ulybritaniiada emdelip, aman qaldy. Qazir sol elde turyp jatyr. Ózine qastandyq jasalǵaly beri ol álemdi aralap, qyzdardyń bilim alýyna múmkindik berýge shaqyryp keledi. Ol 2014 jyly úndistandyq quqyq qorǵaýshy Kailash Satiarthimen birge beibitshilik salasyndaǵy Nobel syilyǵyn ielengen.
