بەيبٸتشٸلٸك بويىنشا نوبەل سىيلىعىنىڭ لاۋرەاتى, 2012 جىلى قىزداردىڭ بٸلٸم الۋ قۇقىعىن قورعاعانى ٷشٸن پەكٸستاندىق تەلٸپتەردٸڭ شابۋىلىنا ۇشىراعان مالالا يۋسۋفزاي 9 قاراشادا Twitter جەلٸسٸندە تۇرمىس قۇرعانىن حابارلادى.
ول اسەر مەلٸك ەسٸمدٸ جٸگٸتپەن وتباسىن قۇرعان. نەكە قۇرۋ رەسٸمٸ ۇلىبريتانييانىڭ بيرمينگەم قالاسىندا يسلام عۇرپى بويىنشا ٶتكەن.
"بٷگٸن ٶمٸرٸمدەگٸ ەڭ ماڭىزدى كٷن. اسەر ەكەۋٸمٸز نەكەلەسٸپ, ٶمٸرلٸك سەرٸك اتاندىق. شاعىن نەكەلەسۋ رەسٸمٸن بيرمينگەمدەگٸ ٷيٸمٸزدە وتباسىمىزبەن بٸرگە اتاپ ٶتتٸك. بٸز ٷشٸن دۇعا ەتۋلەرٸڭٸزدٸ سۇرايمىن. بولاشاققا بٸرگە قادام باسۋعا اسىقپىز" دەپ جازدى مالالا Twitter'دە.
ونىڭ جازباسىنا 310 مىڭ لايك باسىلىپ, 23 مىڭ رەت قايتالاپ باسىلعان.
مالالانىڭ سەرٸگٸ اسەر ماليك Twitter'دەگٸ اككاۋنتىندا پەكٸستان كريكەت كەڭەسٸندە قىزمەت ٸستەيتٸن بيزنەس مەنەدجەر دەپ جازىپ قويعان.
مالالا 2012 جىلى پەكٸستاندا ٶزٸ وقىپ جٷرگەن مەكتەپ اۆتوبۋسىنا جاسالعان شابۋىل كەزٸندە باسىنا وق تيٸپ, جارالانعان. شابۋىلدى مالالانىڭ قىزدارعا بٸلٸم بەرۋ كامپانيياسىنا قارسى تەلٸپتەر جاساعان. مالالا شابۋىلدان اۋىر جارالانعان, بٸراق ۇلىبريتانييادا ەمدەلٸپ, امان قالدى. قازٸر سول ەلدە تۇرىپ جاتىر. ٶزٸنە قاستاندىق جاسالعالى بەرٸ ول ەلەمدٸ ارالاپ, قىزداردىڭ بٸلٸم الۋىنا مٷمكٸندٸك بەرۋگە شاقىرىپ كەلەدٸ. ول 2014 جىلى ٷندٸستاندىق قۇقىق قورعاۋشى كايلاش ساتيارتحيمەن بٸرگە بەيبٸتشٸلٸك سالاسىنداعى نوبەل سىيلىعىن يەلەنگەن.
