Memleket basshysy Qasym-Jomart Toqaevtyń «Kitap oqý mádenietin damytý jáne zerdeli ult qalyptastyrý jónindegi sharalar týraly» Jarlyǵy aiasynda elimizde aýqymdy ziiatkerlik-aǵartýshylyq bastama qolǵa alyndy, dep habarlaidy ult.kz.
Osy bastama sheńberinde ótip jatqan «Jyldyń on oqyrmany» jobasy men kitap oqý marafony elimizdiń 195 aýdany men 87 qalasyn túgel qamtidy. QR Mádeniet jáne aqparat ministri Arman Qyryqbaevtyń aitýynsha, qatysýshylar segiz sanat boiynsha baq synaidy. Jobaǵa mektep oqýshylary, stýdentter, ustazdar, memlekettik qyzmetshiler, ǵalymdar, jazýshylar, jýrnalister jáne kitapqumar barsha azamat qatysa alady.
Bastamanyń basty muraty — qoǵamda turaqty kitap oqý mádenieti men syni oilaýdy damytý, sondai-aq Qazaqstandy álemdegi eń kóp kitap oqityn on memlekettiń qataryna qosý. Eleýmettik jáne jas ereksheligine qaramastan, kitapty bilimniń negizgi kózi retinde dáripteitin bul jobany Qazaqstan Jazýshylar odaǵy men qalamgerler qaýymy da qyzý qoldap otyr.
Marafonda oqýǵa usynylǵan shyǵarmalar qatarynda Nobel syilyǵynyń iegeri Mo Iannyń «Sarymsaq jyry» romany bar. Biyl alǵash ret qazaq tilinde jaryq kórgen bul týyndynyń tusaýkeseri avtordyń óziniń qatysýymen ótken bolatyn. Qytailyq jazýshy bul romannyń qazaqstandyq oqyrmandarǵa arnalǵan marafon tizimine engenine qýanyshyn bildirip, arnaiy beineúndeý joldady.
