Vladislav Geraskevich jarystan keiin "No war in Ukraine" (Ýkrainada soǵys bolmasyn) jazýyn kórsetip tur. Pekin, 11 aqpan 2022 jyl.
Pekinde ótip jatqan qysqy olimpiada oiyndarynda shana sportynan olimpiadaǵa qatysqan ýkrainalyq Vladislav Geraskevich jarystan keiin Ýkraina týy tústes qaǵazǵa jazylǵan "No war in Ukraine" (Ýkrainada soǵys bolmasyn) degen jazýdy kórsetti. Osy arqyly 23 jastaǵy Resei men Ýkraina arasyndaǵy jaǵdaidyń ýshyqqanyna meńzedi, dep habarlaidy Azattyq.
"Bul – meniń ustanymym. Barlyq adam siiaqty men de soǵysty qalamaimyn. Elimde, álemde beibitshilik bolǵanyn qalaimyn. Eshkim bul soǵysty qalamaidy. Ustanymym úshin, beibitshilik úshin kúresemin" dedi sportshy jarystan soń.
Vladislav Geraskevich soǵys pen qarý jaily jańalyqtan Ýkraina jurty alańdap otyrǵanyn da aitty.
"21 ǵasyrda bul aqylǵa syimaidy. Munyń bári bastalmai turyp, álemge ustanymymdy kórsetkim keldi" dedi sportshy.
Vladislav Geraskevich jarysta shana jarysynan erler arasynda 18-oryn aldy.
Halyqaralyq olimpiada komitetiniń (HOK) erejesine sai, sportshy jarys kezinde qandai da bir saiasi atribýt ia aktsiia uiymdastyrýǵa bolmaidy.
Biraq HOK sportshyny jazalmaitynyn málimdep, sportshynyń áreketin "jalpy beibitshilikke shaqyrý" dep baǵalady.
Pekin olimpiadasy AQSh pen Qytaidyń, Resei men Ýkrainanyń ainalasynda jaǵdai shielenisken tusta ótip jatyr.
Keiingi ýaqytqa Resei Ýkrainamen shekara mańyna 100 myńnan asa áskerilerin shoǵyrlandyryp, jii áskeri jattyǵý uiymdastyryp jatyr. Kiev Máskeý Ýkrainaǵa basyp kirýdi josparlaidy dese Kreml Ýkrainaǵa shabýyl jasamaitynyn aitady. Biraq Máskeý Batys elderine "Sovet odaǵynyń quramynda bolǵan elder, sonyń ishinde Ýkraina NATO-ǵa múshe bolmaýy tiis" degen talap qoiyp otyr.
AQSh jáne Eýropa elderi Resei Ýkrainaǵa basyp kirse qatań sanktsiia salatynyn málimdegen.
