Elbasy Nursultan Nazarbaev Qazaqstan halqyna joldaýynda bilim berý júiesiniń róli ózgerýge tiis dep málimdedi, dep habarlaidy "Ult aqparat".
Memleket basshysy óz joldaýynda: "Bizdiń mindetimiz – bilim berýdi ekonomikalyq ósýdiń jańa modeliniń ortalyq býynyna ainaldyrý. Oqytý baǵdarlamalaryn syni oilaý qabiletin jáne óz betimen izdený daǵdylaryn damytýǵa baǵyttaý qajet", - dedi.
Sonymen birge, IT-bilimdi, qarjylyq saýattylyqty qalyptastyrýǵa, ultjandylyqty damytýǵa basa kóńil bólý kerek. Qala men aýyl mektepteri arasyndaǵy bilim berý sapasynyń alshaqtyǵyn azaitý qajet.
Bul týrasynda Elbasy Úkimetke tiisti usynystar berýdi tapsyrdy. Atap aitqanda, úsh tildi oqýǵa kezeń-kezeńmen kóshý máselesi boiynsha usynystar ázirleýdi júktedi.
"Qazaq tiliniń basymdyǵy saqtalady. Onyń ári qarai damýyna zor kóńil bólinedi. Sonymen qatar, búginde aǵylshyn tili – jańa tehnologiia, jańa indýstriia, jańa ekonomika tili. Qazirgi kezde 90% aqparat aǵylshyn tilinde jariialanady. Árbir eki jyl saiyn olardyń kólemi 2 ese ulǵaiyp otyrady. Aǵylshyn tilin meńgermei, Qazaqstan jalpy ulttyq progreske jete almaidy", - dedi N.Nazarbaev.
"2019 jyldan bastap 10-11 synyptarda keibir pánderdi aǵylshyn tilinde oqytatyn bolamyz. Bul máseleni tiianaqty oilanyp, aqylmen sheshý qajet. Mektepterdiń jáne muǵalimderdiń deńgeii, ásirese aýyl men qalada ártúrli. Bilikti pedagogtardyń jetispeý problemasy da bar. Sondyqtan, osynyń barlyǵyn eskerip, aǵylshyn tilin kezeń-kezeńmen engizýimiz kerek", - dep naqty mindetter júktedi.
Elbasynyń bastamasy boiynsha biyl «Barshaǵa arnalǵan tegin kásiptik-tehnikalyq bilim berý» jobasy iske asyryla bastady.
"Tegin oqytýmen eń áýeli jumyssyz jáne ózin ózi tiimsiz jumyspen qamtyǵan jastar, sondai-aq kásiptik bilimi joq eresek adamdar qamtylýy tiis. Kásiptik bilim berý júiesinde, men aitqandai, ekonomikadaǵy jańa óndirister úshin mamandar daiyndaýǵa den qoiý kerek. Ol úshin kásiptik standarttar eńbek naryǵynyń talaptaryna jáne eń úzdik álemdik oqý-óndiristik tájiribelerge sáikes jańartylýy qajet", - dedi Memleket basshysy.
Elbasynyń aitýynsha, joǵary bilim berý júiesi sapasyna erekshe nazar aýdarylady. Joǵary oqý oryndarynyń kadrlyq quramyna, materialdyq-tehnikalyq jabdyqtalý deńgeiine, bilim berý baǵdarlamalaryna qatysty baqylaý men talap kúsheitilýi qajet.
