Elbasy Nursultan Nazarbaev Qazaqstan halqyna joldaýynda agrarlyq sektor ekonomikanyń jańa draiverine ainalýy kerek dep málimdedi, dep habarlaidy "Ult aqparat".
Memleket basshysy óz joldaýynda: "Qazaqstannyń agroónerkásip kesheniniń bolashaǵy zor. Kóptegen pozitsiialar boiynsha biz álemde iri agrarlyq eksporttyq ónim óndirýshilerdiń biri bola alamyz. Bul, ásirese, ekologiialyq taza taǵamdarǵa qatysty. «Made in Kazakhstan» brendi sondai ónimderdiń etalony bolýǵa tiis", dedi.
Sonymen qatar, Qazaqstan astyq ónimderi boiynsha Eýraziiada «nan kárzeńkesi» bolýy kerektigin aitty.
"Shikizat óndirisinen sapaly óńdelgen ónim shyǵarýǵa kóshý qajet. Tek sonda ǵana biz halyqaralyq naryqtarda básekege qabiletti bola alamyz", dedi Elbasy.
Memleket basshysy osy maqsattarǵa qol jetý úshin Úkimet pen ákimderge mynadai tapsyrmalar berdi:
birinshiden, sýbsidiialardy bólý qaǵidalaryn qaita qarastyryp, birtindep ónimdi saqtandyrýǵa kóshý qajet;
ekinshiden, bes jyl ishinde 500 myńnan astam jeke úi sharýashylyqtary men shaǵyn fermerlerdi kooperativterge tartýǵa múmkindik beretin jaǵdai jasaý kerek;
úshinshiden, ónimniń óńdeý sapasyn jaqsartyp, taýarlardy saqtaýdyń, tasymaldaýdyń jáne ótkizýdiń tiimdi júiesin qurý qajet;
tórtinshiden, eńbek ónimdiligin belsendi túrde arttyryp, óndiris shyǵyndaryn tómendetý kerek;
besinshiden, jerdi paidalaný tiimdiligin arttyrýǵa tiispiz. Sýarmaly egis alańyn 5 jyl ishinde 40%-ǵa keńeitip, 2 million gektarǵa jetkizý qajet;
altynshydan, óndiriste suranysqa ie agrarlyq ǵylymi zertteýlerge salynatyn investitsiia kólemin arttyrý kerek.
Sondai-aq, Prezident aýyl sharýashylyǵyn ártaraptandyryp, 2021 jylǵa qarai azyq-túlik taýary eksportyn 40%-ǵa kóbeitýdi tapsyrdy.
Bul mindetter agroónerkásip keshenin damytýdyń jańa memlekettik baǵdarlamasy aiasynda iske asyrylýy qajet ekeni aityldy.
