Belarýste ótip jatqan «Alexander Cup» halyqaralyq týrnirinde Qazaqstandyq aýyr atlet Nijat Rahimov «altyn» aldy. Bul týraly "Ult aqparat" Federatsiiasynyń baspasóz qyzmetine silteme jasap habarlaidy.
Belarýs Respýblikasynyń Grodno qalasynda 1-5 qarasha aralyǵynda ótip jatqan jarys 2020 jyly Tokioda ótetin Olimpiada oiyndaryna irikteý sharasy sanalady. Oǵan 300-ge jýyq sportshy qatysýda.
«Búgin 81 kg deiingi salmaqta jarysqa shyqqan Nijat Rahimov Qazaqstan qorjynyna ekinshi «altyndy» saldy. Ol 81 kelige deiingi salmaqta úzdik atandy. Qos saiys nátijesinde ol 344 kelini (151+193) baǵyndyrdy», - delingen habarlamada.
Aita ketsek, birinshi altyn medaldi Ekaterina Bykova jeńip alǵan edi.
Buǵan deiin 55 kelidegi Zúlfiia Chinshanlo qola júlde jeńip alǵan bolatyn.
Qazaqstan namysyn qorǵaýǵa kelesi atletter attanǵanyn jazǵanbyz:
Nijat Rahimov - 81 kelige deiingi salmaq dárejesinde,
Denis Ýlanov - 81 kelige deiin,
Igor Son - 55 kelige deiin,
Zúlfiia Chinshanlo - 55 kelige deiin,
Ekaterina Bykova – 71 kelige deiingi salmaq sanatynda.
