Spýtnikten túsirilgen sýrette Qara teńizdegi Sevastopol portynda turǵan Resei áskeri teńiz kúshteriniń súńgýir qaiyǵyna áldebir zatty tiep jatqany baiqalady. 29 sáýir 2022 jyl.
Reseidiń Ýkrainadaǵy soǵysta nysanaǵa týra tiedi degen qarýy, ózin-ózi dáldeitin zymyrandary men bombalary tehnikalyq deńgeii tómen ekenin kórsetti. Onyń ústine mundai qarýdyń Reseidegi qory kúrt azaiyp ketti, - deidi aty-jóni atalmaǵan Pentagon qyzmetkerleri New York Times gazetine bergen suhbatynda.
Amerika derekterine qaraǵanda, [Resei kúshteri] 2 mamyrǵa deiin Ýkraina aýmaǵyn osyndai qarýmen 2100-den astam ret atqylaǵan. Mundai qarýdyń jetispeýi sebebinen ony qoldaný ekinshi aptada-aq aitarlyqtai azaiǵan, ári qazir Resei negizinen kádimgi bombalardy qoldanýǵa kóshken deidi gazettiń Pentagondaǵy aqparat kózi.
Resei ushqyshtary ádette jerdegi nysanalardy tez ajyratyp taýyp, olardy zymyranmen dál kózdep ata almaidy. Ýkrainanyń áýe shabýylyna qarsy qorǵanys júielerin Reseidiń joia almaýy, óz áskeri áýe kúshterin áýede basymdyqpen qamtamasyz ete almaýy ishinara osyndai sebeppen túsindiriledi. Ýkrainadan tys jerden Ýkraina aýmaǵyna atylǵan zymyrandar kóp jaǵdaida nysanaǵa timei múlt ketedi ne jarylmai qalady.
Resei mundai qarýdy jasaý jónindegi tyńǵylyqty jumysty – bul jaǵynan AQSh-tan 20 jyldan astam ýaqytqa artta qalyp – tek keiingi eki onjyldyq ishinde ǵana qolǵa aldy. Siriiadaǵy soǵys barysynda Resei óz-ózin dáldei alatyn qarýdy sátti paidalandy, biraq bul tym shekteýli ári jasandy jaǵdai aiasynda iske asyrylǵan edi, iaǵni, ol kezde Resei ushqyshtarynyń ondai qarý qoldanýyna eshteńe bóget bolmady, al Ýkrainadaǵy ahýal basqasha, munda atalǵan ushqyshtarǵa Ýkrainanyń áýe shabýylyna qarsy qorǵanys júieleri men Ýkrainanyń joiǵysh ushaqtary qaýip tóndiredi.
Resei Ýkrainada bombalaýshy ushaqtardan ushyrylatyn basqarylatyn qanatty H-101 zymyranyn, "Iskander" jáne "Tochka" ballistikalyq zymyrandaryn ári kemeden ushyrylatyn "Kalibr" qanatty zymyrandarynyń azdaǵan mólsherin qoldanyp otyr. AQSh sarapshylarynyń pikirinshe, reseilik mamandar qanatty zymyrandarǵa baǵyt siltep, ushýdyń ózge de kórsetkishterin kórsetip beretin tiisti baǵdarlama-nusqaýlyqtardy jasaýda qabiletsizdik tanytqan. Ýkrainada mundai qarýdy keń aýqymda qoldanýǵa tyrysý áreketi bul qarýdy daiarlaýdyń Reseide áli kúnge "balalyq kezeńnen aspaǵanyn" kórsetip otyr deidi New York Times sóilesken áskeriler.
