AQSh-tyń bank, tehnologiia, sán jáne shoý-biznes salasyndaǵy iri kompaniialary násilshildikke qarsy narazylarǵa qoldaý bildirdi.
Striming qyzmetin usynatyn Netflix kompaniiasy Twitter-de “Úndemeý sybailas bolýmen birdei. Qara násildilerdiń ómiri mańyzdy. Bizdiń platformamyz bar, bizdiń qara násildi kórermenderimizdiń, qyzmetkerlerimizdiń, avtorlarymyzdyń, talanttarymyzdyń aldyndaǵy jaýapkershilimiz jáne bar” dep jazdy.
Google kompaniiasy óziniń izdeý júiesinde barlyq násil teń dep málimdedi.
“Rasizm áli de qoǵam aýrýynyń qainar kózi bolyp otyr. Osy jaǵdai ózgermeiinshe, Amerikada sonsha dáripteletin erkindik pen teńdik idealdary qoljetimsiz qala bermek” dedi Citibank-tiń qarjy direktory afroamerikalyq Mark Meison óz blogynda.
AQSh-taǵy iri reteiler Target qarsylyq sherýi kezinde kóptegen qalada dúkenderi tonalsa da, narazylardy qoldady. Kompaniia basshysy Djordj Floidtyń ólimi “jyldap jinalǵan jarany” ashty dedi. Kompaniianyń shtab-páteri Floid qaza tapqan Minneapolis qalasynda ornalasqan.
Sporttyq kiimimen tanymal Nike Twitter-de “Rasizmge kóz juma qaramańdar. Bizde beikúná jandardy óltiretinine moiynsunbańdar. Jeleýge jol bermeńder” degen málimdemesi bar video-roligin jariialady. Nike-tiń básekelesi Adidas osy tvitti bólisti.
AQSh-tyń ondaǵan qalasynda násilshildikke qarsy narazylyq sherýleri ótip jatyr. Narazylyq Minnesota shtaty Minneapolis qalasynyń turǵyny Djordj Floid 25 mamyr kúni politsiia qolynan qaza tapqannan keiin bastaldy. Politsiia dúkennen temeki satyp alarda jalǵan aqsha qoldandy degen kúdikpen 46 jastaǵy Floidty tutqyndamaq bolyp, qolyna kisen salady da, jerge jatqyzady. Floid eshqandai qarsylyq tanytpasa da, tutqyndaýǵa kelgen tórt politseidiń biri Derek Shovin onyń moinyn tizesimen basyp, segiz minýttai otyrǵan. Shovin Floidtyń birneshe ret "dem ala almai jatyrmyn" degenin elemegen. Sol jerde esinen tanǵan Floid aýrýhanada kóz jumǵan. Politsiianyń Floidty dál osylai tutqyndaýy videoǵa túsip, áleýmettik jelide tez tarady. Qaza tapqan Floidtyń násili qara, ony ustaýǵa kelgen tórt politseidiń násili aq bolǵandyqtan, jurt muny násilshildik dep qabyldap, jappai sherýge shyǵa bastady.
