Argentinalyq akter Rikardo Darin Netflix-tiń "Máńgilik"seriiasynda / Foto: BBC
Netflix óziniń alǵashqy teleshoýlarynyń birinde ekranda generativti jasandy intellekt (AI) jasaǵan vizýaldy effektilerdi alǵash ret qoldanǵanyn málimdedi, dep habarlaidy Ult.kz.
Kompaniianyń teń tóraǵasy Ted Sarandos Argentinanyń "Máńgilik" ǵylymi-fantastikalyq serialyndaǵy ǵimarattyń qulaý kórinisin jasaý úshin beinelerdi jasaityn jasandy intellekt paidalanylǵanyn aitty.
Ol jasandy intellekt tehnologiiasyn maqtap:
"Filmder men teleshoýlardy arzanyraq emes, jaqsyraq etýge kómektesetin keremet múmkindik", - dep atady.
Generativti jasandy intellektti paidalanýǵa oiyn-saýyq indýstriiasynda kereǵar pikirler óte kóp, "ol adamdardyń jumysyn almastyrady" dep qorqatyndar da bar.
Kompaniia úsh ai ishinde 11,08 milliard AQSh dollary (8,25 milliard fýnt sterling) kiris túskenin jariialaǵannan keiin maýsym aiynyń sońynda ǵana Netflix basshylyǵy túsinikteme berdi. Bul kiris ótken jyldyń sáikes kezeńimen salystyrǵanda 16% - ǵa ósti. Netflix -tiń mundai tabysqa kenelýine Ońtústik Koreianyń "Kalmar oiyny" trilleriniń úshinshi jáne sońǵy maýsymynyń sátti shyǵýy yqpal etti. Filmniń arqasynda kútilgennen de joǵary kórsetkishke, iaǵni osy ýaqytqa deiin 122 million qaralym jinaǵanyn kompaniia málimdegen bolatyn.
Netflix kompaniiasynyń AI qoldaný týraly suraǵyna Sarandos:
"Bul tehnologiia shaǵyn biýdjeti bar jobalarǵa ozyq vizýaldy effektilerdi paidalanýǵa múmkindik berdi", - dep jaýap berdi.
Onyń sózinshe "Máńgilikte" qoldanylatyn generativti AI túsirilim tobyna dástúrli arnaiy effekt quraldaryn qoldanǵannan góri túsirilim rettiligin 10 ese jyldam aiaqtaýǵa kómektesti.
"Osyndai biýdjeti bar shoý úshin shyǵyny óte kóp bolar edi. Bul rettilik shyn máninde Netflix túpnusqa serialynda nemese filminde ekranda paida bolǵan AI-nyń alǵashqy finaldy túsirilimi. Sondyqtan film jasaýshylar nátijege qatty qýandy", - dedi ol.
AI 2023 jyly Gollivýdtaǵy ereýil kezinde kóterilgen negizgi máselelerdiń biri boldy. Úsh aiǵa sozylǵan ereýilde Kinoakterler gildiiasy men amerikandyq teledidar jáne radio ártister Federatsiiasynyń kásipodaǵy jasandy intellektti paidalanýdy retteýdi talap etti.
