QR Indýstriia jáne infraqurylymdyq damý ministrligi álemdegi iri aýylsharýashylyǵy tehnikasyn óndirýshilerdiń biri «CLAAS» nemis kompaniiasymen ónerkásiptik qurastyrý týraly kelisimge qol qoidy, dep habarlaidy atalǵan vedomstvonyń baspasóz qyzmeti.
Qazaqstan men Germaniianyń ónerkásiptik kooperatsiiasyn qurýǵa Memleket basshysy 2019 jylǵy jeltoqsanda GFR-ǵa saparynyń aiasynda «CLAAS Group» kompaniiasynyń Baqylaý keńesiniń tóraǵasy K.Klaas-Miýlhoizermen kezdesýi barysynda bastamashylyq etti. Sapardyń qorytyndysy boiynsha germandyq biznespen jumys isteý úshin QR Premer-Ministriniń Orynbasary Roman Skliardyń basshylyǵymen arnaiy jumys toby quryldy. QR aýmaǵynda aýyl sharýashylyǵy mashinalaryn óndirýdi uiymdastyrý jónindegi jobany pysyqtaýdy QR SIM Investitsiialar jónindegi komiteti, GFR-daǵy QR Elshiligi, «Kazakh Invest» UK« AQ jáne QR Aýyl sharýashylyǵy ministrligi júrgizdi.
CLAAS - álemdik aýylsharýashylyq tehnikasynyń flagmany jáne eýropalyq aýylsharýashylyq tehnikasynyń eń iri óndirýshisi. Áigili nemis kompaniiasynyń Qazaqstanǵa kirýi burynnan qol jetimdi joǵary ónimdi tehnikaǵa muqtaj bolǵan barlyq otandyq agrarlyq qyzmetkerler úshin mańyzdy oqiǵa bolyp tabylady.
Pandemiianyń qazirgi jaǵdaiyn eskere otyryp, Kelisimge qol qoiý beinebailanys arqyly júzege asyryldy. Ministrliktiń atynan qujatqa vitse-ministr Amaniiaz Erjanov, Germaniia tarapynan Shyǵys Eýropa jáne TMD elderi boiynsha óńirlik direktor Dr. Nils Roich buryshtama qoidy.
CLAAS zaýyty Soltústik Qazaqstan oblysynda ornalasady. Mamandandyrylǵan jabdyqty ornatý men tehnikalyq qyzmetkerlerdi daiyndaýdy qosa alǵanda, birinshi kezeńde TUCANO kombainynyń óndirisi jolǵa qoiylady.
Joba Qazaqstandaǵy CLAAS resmi ókili «ST-Agro» kompaniiasymen birlesip iske asyrylady. Oblys ekonomikasyna salynǵan investitsiianyń kólemi shamamen 3,4 mlrd. teńgeni quraidy, qarjylandyrý kózi «CLAAS» kompaniiasynyń menshikti qarajaty bolyp tabylady. Bastapqy kezeńde 200-ge jýyq jańa jumys orny qurylady.
«Biz, «CLAAS« kompaniiasynyń atynan Qazaqstan Úkimetine, Germaniiadaǵy eldiń elshiligine aýyl sharýashylyǵy mashinalaryn jasaý salasyndaǵy josparlanǵan eki jaqty jobany iske asyrýǵa diplomatiialyq qoldaý kórsetkeni úshin óz rizashylyǵymyzdy bildiremiz. Biz Qazaqstan Respýblikasynda úlken áleýetti kórip otyrmyz, sondyqtan uzaq merzimdi, tabysty jáne ózara tiimdi yntymaqtastyq qurýdy josparlap otyrmyz», - dep atap ótti Dr. Nils Roich.
Kelisimniń aiasynda kompaniia komponentterdi oqshaýlaýdy kezeń-kezeńmen ulǵaitady, sondai-aq óndiristi odan ári damytý úshin kadrlardy tehnikalyq daiarlaýmen ainalysady.
Jobalyq qýattylyqqa shyqqan kezde kásiporyn jylyna 200 birlikke deiin aýyl sharýashylyǵy tehnikasyn (kombaindar, traktorlar jáne egis keshenderi) shyǵaratyn bolady, bul QR mashina-traktor parkin jańartý boiynsha jaǵdaidy sapaly túrde jaqsartady.
CLAAS-tyń Qazaqstan aýmaǵynda «PÖTTINGER», «LOVOL», «BUHLER», «Rostselmash», «Peterbýrg traktor zaýyty», «MTZ», «Gomselmash» jáne basqalary siiaqty óndiristi álemge áigili aýyl sharýashylyǵy tehnikalaryn óndirýshilerdiń tizimine enýi fermerlerdiń barlyq qajettilikterin jaba otyryp, importty almastyrý jónindegi eldiń baǵdarlamasyna tolyq sáikes keledi.
Aita ketetin jait, bul jumys Qazaqstannyń AÓK damytý bóliginde memlekettiń tekserilgen indýstriialyq saiasatynyń esebinen júrgizildi.
