Foto: un.org
Qazaqstannyń Syrtqy ister ministrligi ókilderi Reseidiń Qyrymdaǵy áreketterin aiyptaityn qararǵa qarsy daýys berý sebebin túsindirdi, - dep habarlaidy Massaget.kz portaly.
15 jeltoqsanda Niý-Iorkte BUU Bas Assambleiasy "Qyrym Avtonomiialyq Respýblikasy men Sevastopol qalasyndaǵy adam quqyqtary salasyndaǵy jaǵdai" rezoliýtsiiasyn qabyldady. Qazaqstan bul qararǵa qarsy daýys berdi.
"Daýys berý kezinde Qazaqstan tómendegilerdi negizge aldy. Bizdiń elimiz BUU Jarǵysyna sáikes Ýkrainadaǵy qaqtyǵysty beibit jolmen sheshýdi jaqtaidy. Sonymen qatar, biz Ýkrainanyń egemendigi men aýmaqtyq tutastyǵyn jaqtaimyz. Bizdiń ustanymymyz: bul másele, Qyrym Avtonomiialyq Respýblikasy men Sevastopol qalasyndaǵy Adam quqyqtary salasyndaǵy jaǵdai BUU-nyń arnaiy organynda, atap aitqanda BUU-nyń Adam quqyqtary jónindegi keńesinde (MÓS) qaralýy kerek.
Sonymen qatar, BUU Bas Assambleiasynyń BUU-nyń Adam quqyqtary jónindegi keńesi týraly №60/251 qararyna sáikes, AQK óz qyzmetinde tańdamaý, obektivtik jáne saiasilandyrýǵa qarsy qaǵidattaryn basshylyqqa alýy kerek. Qazir Qazaqstan - basqa 46 memleketpen birge BUU AQK múshesi. Qazaqstan 2013, 2015 jyldary Adam quqyqtary jónindegi keńestiń múshesi bolǵan kezde de biz ziian keltirmeý, máselelerdi sheshýge kómektesý qaǵidatyn ustandyq jáne ustanyp kelemiz", - dedi QR SIM baspasóz hatshysy Aibek Smadiiarov brifingte.
Syrtqy ister ministrliginiń ókili aitýynsha, bul qaýly boiynsha Qazaqstannyń ustanymy dáiekti jáne ózgermeidi.
"Qazaqstan osy qarar boiynsha 2016 jyly 71-shi, 2017 jyly 72-shi, 2018 jyly 73-shi, 2019 jyly 74-shi, 2020 jyly 75-shi jáne 2021 jyly BUU Bas Assambleiasynyń 76-shy sessiialarynda daýys berý barysynda osyndai ustanymdy ustandy. Keiingi eki aptada áleýmettik jelilerde túrli emotsional aqparat tarap, Qazaqstan qandai da bir múddeni jaqtady, SIM durys jumys istemeidi degen pikirler qyzý talqyǵa tústi", - dedi ol.
Smadiiarov keiingi eki aptada qoǵam jaǵdaidyń mánin túsinbei jelide emotsional aqparat taratyp ketkenin aitty.
