Antikor.Live baǵdarlamasynda Qazaqstan Respýblikasy Eńbek jáne halyqty áleýmettik qorǵaý vitse-ministri Erbol Ospanov ne sebepti koronavirýspen aýyrǵan meditsina qyzmetkerleriniń bári ótemaqy almaityny týraly aitty, dep habarlaidy QazAqparat.
QR Eńbek jáne halyqty áleýmettik qorǵaý vitse-ministriniń aitýynsha, koronavirýspen aýyrǵan 800-den astam dáriger men meditsinalyq qyzmetker 2 million teńge kóleminde ótemaqy alǵan. Koronavirýs saldarynan qaitys bolǵan meditsina qyzmetkerleriniń otbasylaryna 10 million teńge tólengen úsh jaǵdai boldy.
«Ótemaqy alý týraly ótinishter óte kóp. Basty másele – densaýlyq saqtaý basqarmasy deńgeiindegi komissiia elektrondy júiege ótinish bergen kezde banktik derektemelerdi qate kórsetedi. Eńbek ministrliginiń júiesi derektemeniń durys-burystyǵyn, banktik esepshotty tekserip, bir san jetpei tursa nemese derekteme durys bolmaǵan jaǵdaida ótinishti keri qaitarady. Derekteme durys bolmasa aqsha qaida túsedi?», - deidi QR Eńbek jáne halyqty áleýmettik qorǵaý vitse-ministri Erbol Ospanov.
Ol ótemaqy berilmeýdiń taǵy bir sebebi – diagnozdyń qate qoiylýy ekenin aitty.
«Olar ózderiniń COVID-19-ben aýyrǵanyn kórsetedi, al densaýlyq saqtaý ministrliginiń júiesi ol koronavirýspen aýyrmaǵandyǵyn kórsetedi. Tekserý kezinde anyqtalyp, ótinish qaita qaraý úshin qaitarylady. Densaýlyq saqtaý ministrligimen birlese otyryp bul jumysty bastaǵan alǵashqy kúnderi kóptegen másele týyndady. Olar muny qalai tekserý kerektigin bilmei, treningter ótkizilip, túsindirý jumystary júrgizildi. Qazirgi ýaqytta bul jumys áldeqaida sapaly jasalýda, ótinish berýshiler sany da artyp keledi. Bul jaǵdaidy kúndelikti baqylap otyrmyz», - deidi ol.
Vitse-ministr osy máselege qatysty jemqorlyq táýekeli bolýy múmkin be ekeni týraly jaýap berdi.
«Bul jaǵdaida sybailas jemqorlyqtyń bar-joǵyn anyqtaý qiyn. Meniń oiymsha, komissiia nemese sol deńgeide sheshim qabyldaityn adamdar ... muny adamdar tarapynan ketken qatelikter dep túsindirýge bolady. Olar tehnikalyq turǵyda qatelesip ketýi múmkin. Biz koronavirýspen aýyrǵan meditsinalyq qyzmetkerler kóp ekenin jáne olardyń barlyǵyna memleket belgilegen tiisti qarjylai kómek qajet ekenin túsinemiz. Biz bul jumysty óziniń logikalyq qorytyndysyna jetkizemiz», - deidi Erbol Ospanov.
