Foto: Instagram.com
Qazaqstan áielder quramasynyń bas bapkeri Eldos Saidalin aldaǵy Álem kýbogynyń finalyna daiyndyq barysy men komanda quramyndaǵy ózgerister týraly aitty, dep habarlaidy Ult.kz 1Bol saityna silteme jasap.
Álem kýbogynyń finaly 17–22 qarasha kúnderi Úndistannyń Niý-Deli qalasynda ótedi. Bas bapkerdiń sheshimi boiynsha, Liverpýlde ótken 2025 jylǵy álem chempionatynyń jeńimpazdary men júldegerleri bul jarysqa qatyspaidy.
«Bizde 1-14 qarasha aralyǵynda oqý-jattyǵý jiyny ótedi. Úndistanda ótetin Álem kýbogynyń sońǵy kezeńine ár salmaq dárejesinen úsh sportshydan daiyndaimyz. Barlyǵy bes úzdik boksshy el namysyn qorǵaidy», — dedi Eldos Saidalin.
Sondai-aq ol álem chempionatynda óner kórsetken sportshylarǵa demalys berilgenin atap ótti:
«Olar bul jiynǵa qatyspaidy. Jeltoqsan aiynan bastap qaita jattyǵý protsesine qosylady», - dedi bapker.
Eske salaiyq, Liverpýlde ótken álem chempionatynda Qazaqstan áielder quramasy jalpykomandalyq esepte birinshi oryn ielengen bolatyn.
Chempion atanǵandar: Alýa Balkibekova, Aida Ábikenova, Natalia Bogdanova.
Nazym Qyzaibai kúmis, al Viktoriia Grafeeva men Eldana Tálipova qola júldege qol jetkizgen.
Aita keteiik, álem chempionatynyń jeńimpazdary men júldegerleri qazan aiynda Semeide ótken Qazaqstan chempionatyna da qatysqan joq.
