Búgin Qazaqstan Prezidenti Nursultan Nazarbaevtyń tóraǵalymen el Úkimetiniń keńeitilgen otyrysy bastaldy, dep habarlaidy Ult.kz tilshisi QazAqparat agenttigine silteme jasap.
Otyrys barysynda elimizdiń 2017 jylǵy áleýmettik-ekonomikalyq damý qorytyndylary shyǵarylyp, aldaǵy ýaqytta ekonomikalyq ósimdi qamtamasyz etý jónindegi sharalar aiqyndalady dep kútilýde.
Aita keterligi, 2017 jyly ishki jalpy ónim ósimi 4 paiyzdy qurady. Negizgi kapitalǵa salynǵan investitsiia kólemi 5,5 paiyzǵa artyp, ónerkásip óndirisiniń kólemi 7,1 paiyzǵa ulǵaidy. 2017 jyldyń 9 aiynda shetel investitsiiasynyń taza túsimi 3 034,8 mln dollardy qurady. Ótken jyldyń qańtar-qarasha ailarynyń aralyǵynda Qazaqstannyń syrtqy saýda ainalymy 69,5 mlrd dollarǵa jetip, 2016 jyldyń sáikes kezeńimen salystyrǵanda 25,1 paiyzǵa artty. Onyń ishinde eksport kólemi 43,1 mlrd dollarǵa jetip otyr. Ulttyq banktiń altyn-valiýta aktivi 31,1 mlrd dollar boldy. 2018 jyldyń 1 qańtarynda jeke tulǵalardyń depozitteri 3,7 paiyzǵa kóbeiip, 8120,9 mlrd teńgeni qurady.
Óńirlik shekte ónerkásip óndirisiniń kóleminiń artýy 14 óńirde baiqaldy. Eń joǵary ósim Atyraý oblysy men Astana qalasynda tirkelgen. Al aýyl sharýashylyǵy jalpy óniminiń ósimi 2,9 paiyzǵa jetti. Bul rette aýyl sharýashylyǵy ónimderi óndirisiniń elimizdiń 14 óńirinde baiqalǵanyn atap ótken oryndy. Eń joǵary ósim - Mańǵystaý, Pavlodar, Jambyl jáne Aqtóbe oblystarynda. Qurylys salasyndaǵy ósimniń joǵarylaýy Qostanai, Aqmola, Qyzylorda jáne Aqtóbe oblystarynda baiqalady. Jalpy, 2017 jyldyń qańtar-jeltoqsan ailarynda paidalanýǵa berilgen úilerdiń ósimi 6,2 paiyzǵa jetip otyr.
