QR Tuńǵysh Prezidenti Nursultan Nazarbaevtyń «Habar» telearnasyna bergen suhbatynyń tolyq videonusqasy jariialandy, dep habarlaidy "Ult aqparat".
Aita keteiik, Elbasy suhbat barysynda Prezident ókilettigin nelikten toqtatqanyn túsindirdi. 30 jyldyq eńbeginiń nátijesinde óziniń seriktesterimen jáne zamandastarymen birge 100 jylǵa tatityn sharýa atqarylǵanyn atap ótti.
El tynyshtyǵy máselesi týraly aita kele: «Basqa memleketke qashyp ketken qylmyskerler sol jaqtan ártúrli daqpyrt taratady. Olardy aiaimyn. Eshkimge de kereksiz, Otansyz adamdar óziniń elinde jamanshylyq bolsa eken dep oilaidy. Onda aramzaǵa qalai adamnyń búiregi burýy kerek. Aityńdarshy?! Qazaqstanda jaman bolsyn, Qazaqstan shýyldasyn, Qazaqstan tóbelessin, qyrylyssyn deidi. Ondai jaýyzdardyń sózin tyńdamaý kerek», - dedi. Sondai-aq ulttyń aqsaqaly, janashyry retinde jastarǵa eń aldymen, bilim alýǵa tyrysý kerektigin qadap aitty. «Eger Táýelsizdikti saqtap qalamyz desek, eldiń birligin saqtaýymyz kerek», - dedi Tuńǵysh Prezident.
Eldiń basty baǵyty – aldyńǵy qatardaǵy 30 eldiń qataryna qosylý. Qazirgi maqsat – atqarylǵan jumystyń qarqynyn toqtatpai, ary jalǵastyrý.
Budan bólek, Nazarbaev Prezident qyzmetine birneshe adamnyń kandidatýrasyn qarastyrǵanyn jáne nelikten Qasym-Jomart Toqaevty tańdaǵanyn túsindirdi.
«Qosarlanǵan bilik» tóńiregindegi alyp-qashpa áńgimelerge de núkte qoiyldy. «Men munyń barlyǵyn estip, oqyp otyrmyn. Bul qýlyq áreketten shyǵyp otyr. Ósekti Qazaqstanda turaqtylyqty qalamaityn adamdar ádeii shyǵaryp otyr. Osy jerde tóbelestiń, qosarlanǵan biliktiń bolǵan qalaidy. Bizdiń Otanyn satqan qashqyn urylar, ana jaqtan halyqtyń tynysh ómirin buzý úshin osyndai aqparattardy taratyp otyr. Munyń eshqandai negizi joq. Sebebi Qazaqstan basqarýdyń prezidenttik formasy bar ýnitarly memleket sanalady», - dedi ol.
Suhbat kezinde N.Nazarbaev qazirgi ýaqytta nemen ainalysatynyn, aldaǵy ýaqytta ózi salǵan sýretter kórmesin ótkizý josparda baryn jetkizdi.
