© Sputnik / Vladislav Vodnev
Parlament Májilisi Tuńǵysh Prezident týraly zańnyń kúshin joiý máselesin qarap jatqan joq. Bul týraly Májilis tóraǵasy Erlan Qoshanov málimdedi, dep habarlaidy Sputnik Qazaqstan.
Májilistiń jalpy otyrysynan keiin spiker Erlan Qoshanov jýrnalister aldyna shyǵyp, saýaldarǵa jaýap berdi. BAQ ókilderi Parlament Nursultan Nazarbaev pen onyń otbasyn qorǵaityn Tuńǵysh Prezident týraly zańnyń kúshin joiý máselesin qarai ma dep surady.
"Bul májilistiń josparynda joq. Biz nege onyń kúshin joiýymyz qajet. Mundai másele turǵan joq. Ol - tarihi tulǵa, Elbasynyń tarihi róli zor ekenine eshkim daýlaspaidy dep oilaimyn", - dedi Qoshanov jýrnalisterge.
Ol buǵan deiin depýtattar zańǵa birqatar ózgeris engizip, Elbasyny Qaýipsizdik keńesi men Qazaqstan halqy Assambleiasyn ómir boiy basqarý quqyǵynan aiyrǵanyn eske saldy.
Sonymen qatar, eldiń syrtqy jáne ishki saiasatyn Elbasymen kelisý normasy da alynyp tastalǵanyn atap ótti.
"Tek Elbasy mártebesi týraly ǵana norma qaldy. Sondyqtan eshkim mundai másele qozǵap otyrǵan joq", - dedi spiker.
Buǵan deiin Ádilet ministri Qanat Mýsin Tuńǵysh Prezident týraly zańdy alyp tastaýdy tek Parlament qana usyna alatynyn aitqan bolatyn.
"Zańdy ony qabyldaǵan Parlament qana alyp tastaidy. Iaǵni, Parlament mundai zań kúshin joiýǵa tiis degen sheshim qabyldai alady", - dedi ministr.
