Senat depýtaty Dariǵa Nazarbaeva jýrnalisterge bergen suhbatynda BAQ-taǵy ózekti máselelermen tanys ekenin atap ótti, dep habarlaidy Sputnik Qazaqstan agenttigi.
Nazarbaeva adam ólimi, sýǵa batyp ketý, zorlyq-zombylyq syndy jaǵymsyz aqparattar BAQ-ta kóbeiip ketkenin aitady.
"Bizdiń mass-media reiting qýyp ketti. Ekinshiden, nege ekeni belgisiz, osyndai aqparattar aýditoriiany tolǵandyrady. Bul "sheńberdi ainalyp júrgendei" áser qaldyrady. Biz kóbinese jaqsy jańalyqtardy aitqymyz keledi. Alaida tek jaǵymsyz jańalyqtar beretin redaktsiianyń reitingisi joǵary ekenin baiqap júrmiz. Eger basymdyqty pozitivti jańalyqtarǵa bersek, reitingimiz qulaidy", - dedi depýtat Senat kýlýarynda.
Osy rette Dariǵa Nazarbaeva jýrnalisterge áli de aýditoriiamen jumys isteýge keńes berdi.
"Halyqtyń ne qalaitynyn bilip, trendti ózgertý kerek. Osy maqsatta úlken jumystar júrgizilýi shart", - dedi ol.
Depýtat búgingi tańda turǵyndardyń kóbisi ósek-aiańdy oqýǵa qumar ekenin jasyrmady.
"Alaida azamattar jan-jaǵynda ne bolyp jatqanyn bilgisi keledi. Ósek jinap, sol ósektiń ainalasynda sóileskendi unatady. Ókinishke, qarai osyndai qubylysqa qarsy birdeńe isteý qiyn. Sondyqtan atalǵan máselede memlekettik organdar men BAQ birigip, balansty izdeýi shart", - dep túiindedi sózin Dariǵa Nazarbaeva.
