Parlament Májilisiniń depýtaty Dariǵa Nazarbaeva balabaqsha tárbieshileri máselesine qatysty Úkimet basshysy Asqar Maminniń atyna depýtattyq saýal joldady, dep habarlaidy "Ult aqparat".
«Mektepke deiingi jekemenshik mekemeler jelisiniń keńeiýi qoǵamdaǵy shielenisti báseńdetip, balabaqshalardaǵy bos oryn máselesiniń ózektiligin tómendetti. Atalǵan jekemenshik ieleri óz qarajattaryna ǵimaratty satyp alyp, onyń jóndeý jumystaryn jasaidy, sonyń nátijesinde memleket qazynasy qomaqty qarajatty únemdep, salyq salynatyn negiz kózi artady. Jańa jumys oryndary ashylyp, azamattarymyz sapaly qyzmet alady. Sol sebepti memleket pen qoǵamǵa atalǵan salanyń mańyzdylyǵy erekshe bólek. Atalmysh salanyń odan ári damýy memlekettiń turaqty qamqorlyǵyn talap etedi. Bizdi bilim salasyndaǵy sheshimin tappaǵan jáne ózekti másele bolyp sanalatyn memlekettik tapsyrys aiasynda qarjylandyrylatyn jekemenshik balabaqshalardaǵy pedagogtar jalaqysynyń tómendigi mazalap otyr», - dedi depýtat.
Onyń aitýynsha, aldaǵy 2 jyl ishindegi memlekettik tapsyrysta mektepke deiingi jeke menshik mekemelerde pedagogtardyń jalaqy deńgeiin kóterý qarastyrylmaǵan edi.
«Qazaqstan Respýblikasynyń Bilim jáne ǵylym ministriniń mindetin atqarýshynyń 2020 jyldyń 20 qazanyndaǵy № 452 buiryǵymen «Qazaqstan Respýblikasynyń Bilim jáne ǵylym ministriniń 2017 jyldyń 27 qarashasyndaǵy № 597 «Mektepke deiingi tárbie men oqytýdyń, orta, tehnikalyq jáne kásiptik, orta bilimnen keiingi, joǵary jáne joǵary oqý ornynan keiingi kredittik tehnologiiamen bilim berýdiń jan basyna shaqqandaǵy normativtik qarjylandyrý Ádistemesin bekitý týraly» buiryǵyna ózgertýler engizý arqyly, atalǵan Ádistemege ózgertýler engizilgen.
Mektepke deiingi bilim berý isine bailanysty Ádistemede tómendegi eskerilgen:
1. 2019 jyldyń 1 qańtarynan jáne 1 maýsymynan bastap ósýin eskere otyryp, laýazymdyq jalaqyny esepteý barysynda koeffitsentterdiń ósýi;
2. Resmi jalaqyǵa túzetý koeffitsentin 2020 jyly 25%, 2021 jyly 50%, 2022 jyly 75%, 2023 jyly 100% mólsherinde engizý;
3. Pedagogtardyń eńbek demalysynyń uzaqtyǵyn 56 kúntizbelik kúnge deiin arttyrý.
«Degenmen atalǵan buiryq jergilikti mekenderde oryndalmai otyr. Saldarynan jeke menshik balabaqshalarynyń pedagogtary óz eńbekteriniń adal tólem aqysyn ala almai otyr. QR «Bilim týraly» Zańynyń 6 baby 3 tarmaǵynyń 7-1 tarmaqshasy jáne 2 tarmaǵynyń 7-3 tarmaqshasyna sáikes, jergilikti atqarýshy organdar mektepke deiingi tárbie berý jáne oqytý isine memlekettik tapsyrysty bekitedi. Eger de jergilikti biýdjette qarajat tapshylyǵy jaǵdaiynda jan basyna qarjylandyrý tetigin iske asyrý úshin respýblikalyq biýdjetten maqsatty aǵymdaǵy transfertter esebinen shyǵyndardy óteý qarastyrylǵan. Qazirgi ýaqytta ákimdikter bir balabaqsha tárbielenýshisine jan basyna shaqqandaǵy normativtiń mólsherin erikti túrde anyqtaidy, al bul belgilengen normativtiń ortasha mólsherinen edáýir tómen. Nátijesinde jekemenshik balabaqshalar men pedagogter tiisti qarjyny ala almai otyr. Kóptegen mamandar jumysynan aiyrylyp, mekemeler jabylýda», - dedi D. Nazarbaeva.
Depýtat joǵarydaǵyny eskere otyryp, oblystardaǵy memlekettik tapsyrystyń kólemi qalai qalyptasatyny, jeke qarjylandyrý aiasynda bólingen qarajat jergilikti atqarýshy organdarmen is júzinde qaida bólinetini, jergilikti atqarýshy organdardyń jeke qarjylandyrýdyń kólemin tómendetýge quqyǵynyń bar-joǵy týraly suraqtardy joldady.
«Aimaqtarda memlekettik tapsyrystyń qalyptasýy men onyń júzege asýyn kim baqylaidy jáne qalai júzege asyrady? Jergilikti biýdjetterdiń jetispeitin qarajatyn respýblikalyq biýdjetten óteý mehanizmi qandai?», - dep surady D. Nazarbaeva Úkimet basshysynyń atyna joldaǵan depýtattyq saýalynda.
