Senat tóraǵasy Dariǵa Nazarbaeva "Kúndelik" elektrondy kúndeligi servisine qatysty pikir bildirdi, dep habarlaidy "Ult aqparat" Senattyń saityna silteme jasap.
Senat biýrosynyń otyrysynda Dariǵa Nazarbaeva bilim berý, densaýlyq saqtaý júielerin tsifrlandyrý men aýyldardaǵy internet máselelerin sheshýdi tapsyrdy. Onyń aitýynsha, qazir aimaqtarda internet joq jáne ol muǵalimder júktemesin ulǵaitady degen syltaýmen "Kúndelik" elektrondy kúndeligi servisiniń jumysy shektele bastaǵan.
"Árbir jekelegen jaǵdaidyń sheshimin izdestirý kerek. Ákimdikter men jergilikti bilim basqarmalaryna elektrondy kúndelik nege tiimsiz? Óitkeni ol barlyq bilim berý, testileý, sabaqqa qatysý, sabaq ótkizý júiesin ashyq kórsetedi", - dedi Nazarbaeva.
Tóraǵanyń pikirinshe, "Kúndelik" barlyq sabaqtyń bolatynyn álde qaǵazda ǵana qalatynyn anyqtap beredi.
"Búgingi kúni elektrondy kúndelik oqýshylardyń úlgerim deńgeiin, muǵalimderdiń ózderiniń daiyndyǵyn – osynyń bárin kórsetip otyr. Bul olarǵa tiimsiz", - dedi ol.
Senat tóraǵasy sondai-aq aýyldyq nysandarǵa, onyń ishinde áleýmettik infraqurylym obektilerine joǵary jyldamdyqtaǵy internet júrgizý úshin ákimdikterge bólingen qarajattyń qalai igerilgenin tekserý qajet dedi.
"Meniń oiymsha, depýtattar aimaq basshylary sirek baratyn eń shalǵai eldi mekenderde bolý kerek. Osy sapar kezinde depýtattardyń negizgi maqsaty azamattardyń ózekti máselelerin sheshý bolýy tiis", - dedi joǵarǵy palata basshysy.
